2025 гъэм и мазибгъум Къэбэрдей-Балъкъэрым и экономикэ IэнатIэ нэхъыщхьэхэм хэхъуэфIхэр къагъэлъэгъуащ, щыжаIащ КъБР-м Экономикэ зыужьыныгъэмкIэ и министерствэм.
Къапщытэж пIалъэм къриубыдэу промышленнэ продукцэу къыщIагъэкIам и куэдагъым проценти 8,5-кIэ хэхъуащ нэгъабэ и апхуэдэ лъэхъэнэм яхузэфIэкIам елъытауэ. Езым къыщIагъэкIа продукцэу нэгъуэщI щIыналъэхэм хурагъэшам сом мелард 57,4-рэ къыпэкIуащ е 2024 гъэм и щIышылэм - фокIадэм щыIа бжыгъэхэм нэхърэ процент 24,7-кIэ нэхъыбэу.
Мэкъумэш хозяйствэми хэхъуэхэр къигъэлъагъуэ зэпытщ. Мэкъумэш, фермер, уней IуэхущIапIэхэмрэ унагъуэхэмрэ зэхэту къыщIагъэкIащ сом мелард 61-рэ и уасэ продукцэ - нэгъабэ и апхуэдэ пIалъэм щыIа бжыгъэхэм нэхърэ проценти 5,5-кIэ нэхъыбэ.
Республикэм и ухуэныгъэ IэнатIэм и хэхъуэр зытIэкIукIэ нэхъ мащIэщ. Апхуэдэу щытми, псори зэхэту сом мелард 28,1-рэ и уасэ лэжьыгъэ ирагъэкIуэкIащ дызэрыт илъэсым и мазибгъум къриубыдэу. Ар процент 1,3-кIэ нэхъыбэщ нэгъабэ и щIышылэм - фокIадэм щыIа бжыгъэхэм нэхърэ.
Розницэ сатум проценти 7,3-кIэ хигъэхъуащ икIи къапщытэж пIалъэм къриубыдэу сом мелард 253,9-рэ и уасэ зэригъэкIуэкIащ.
ШхапIэхэм я хэхъуэр процент 19,3-кIэ нэхъыбэ хъуащ е сом мелард 14,2-м нызэрыхьэсащ.
2025 гъэм и мазибгъум IуэхущIапIэхэм щат улахуэр ику иту сом 51 170,2-рэ хъуащ. Нэгъабэ и апхуэдэ пIалъэм щыIа бжыгъэхэм нэхърэ процент 13,2-кIэ ар нэхъыбэщ. Апхуэдэуи, цIыхухэм ипэжыпIэкIэ къаIэрыхьэ улахуэм и куэдагъым, инфляцэри къэлъытауэ, проценти 3,7-кIэ хэхъуащ.
«Къэбэрдей-Балъкъэрым и экономикэ IэнатIэ нэхъыщхьэхэм: промышленностым, мэкъумэш хозяйствэм, ухуэныгъэм, сатум, шхапIэхэм хэхъуэхэр къагъэлъагъуэ зэпытщ. Дэ долъагъу, абыхэм къыщIагъэкI продукцэхэмрэ ялэжь Iуэхутхьэбзэхэмрэ я куэдагъым зэрызаIэтыр икIи абыхэм я фIагъ йокI республикэм и экономикэм. Лэжьыгъэр нэхъыбэ зэрыхъум къыдэкIуэу, улахуэхэми фIыуэ зэрыхэхъуам и Iэужьу, цIыхухэм я псэукIэр ефIакIуэ зэпытщ, республикэм и экономикэми зегъэбыдэ.
Шэч хэлъкъым, Iуэхур адэкIи апхуэдэу екIуэкIмэ, республикэм и социально-экономикэ зыужьыныгъэм ехьэлIауэ къытпэщылъ къалэнхэр ехъулIэныгъэ диIэу зэрыдгъэзэщIэнум», - жиIащ КъБР-м экономикэ зыужьыныгъэмкIэ и министр Рахаев Борис.
ХЬЭЩЫКЪУЕЙ Олег.
