КъМР-де ич ишле министр полицияны генерал-лейтенанты Вячеслав Крючков милицияны генерал-майору Руслан Ешугаовну хурметине ишлетилген эсгертмени ачылыууна къатышханды. Ол Нальчикде РФ-ни МВД-сыны Шимал-Кавказ федерал округда Баш управлениясыны экстремизмге къажау арасыны тийресинде салыннганды.
Анга аталгъан жумушлагъа РФ-ни МВД-сыны Шимал-Кавказ федерал округда Баш управлениясыны таматасы полицияны генерал-полковниги Сергей Бачурин, КъМР-ни экономика эм жамауат къоркъуусузлукъ советини секретары Казбек Татуев, Парламентни депутаты Руслан Гятов эм башхала къатышхандыла.
Эсгертмени ишлеу жаны бла башламчылыкъны къуралгъан аманлыкъчылыкъгъа къажау службаны ветеранлары этгендиле. Аны Шимал Осетия-Алания Республиканы сыйлы художниги, скульптор Таймураз Зангиев ишлегенин айтырчады.
Руслан Ешугаов къуралгъан аманлыкъчылыкъгъа къажау управленияда къуллукъ этгенди. Ол билимли, сынаулу коллектив жыйып, регионда аманлыкъчылыкъгъа къажау ишни бийик даражада къураялгъанды. Хар операцияны да тынгылы хазырлагъандыла, Ешугаов этген буйрукъла уа аланы хайырлы бардырыргъа онг бергендиле.
Ич ишле органлада къуллукъ этгенден сора ол кёп жылланы КъМР-ни экономика эм жамауат къоркъуусузлукъ советине башчылыкъ этгенди. Республиканы керти уланы дуниясын 2022 жылда 27 декабрьде алышханды.
Эсгертмени Сергей Бачурин бла «Къуралгъан аманлыкъчылыкъгъа къажау службаны ветеранларыны лигасы» организацияны башчысы милицияны отставкада полковниги Виталий Хапов ачхандыла.
Сергей Бачурин Руслан Ешугаов кишиликни, антына кертиликни юлгюсюн кёргюзтгенин белгилегенди.
Жыйылгъанла эсгертмеге гюлле салгъандыла эм Руслан Ешугаовну бир минут шумсуз туруп эсгергендиле.
Тикаланы Фатима хазырлагъанды.
