КъМР-ни Парламентини Урунуу, социал политика, саулукъ сакълау эм ветеранланы ишлери жаны бла комитетини келечилери, республиканы законла чыгъарыучу органыны спикери Татьяна Егорованы башчылыгъында Республикалы клиника больницада болгъандыла. Депутатла къан тамырлагъа бакъгъан араны иши бла шагъырейленнгендиле.
Бу жолоучулукъ «тёгерек столгъа» хазырланыуну чеклеринде къуралгъанды. Анда уа КъМР-де жюрек-къан тамырла хирургия жаны бла бийик технологиялы болушлукъ къалай берилгенин тинтирге белгиленеди.
Татьяна Егорова аны юсюнден журналистлеге былай айтханды:
- Бу магъаналы сорууну сюзерден алгъа болушлукъ къалай къуралгъанын кеси кёзюбюз бла кёрюрге сюйгенбиз. Жарсыугъа, жюрек-къан тамырланы аурууларыны, инсультланы, инфарктланы хатасындан къыралда эм республикада да ауушханланы саны уллулай къалады. Ауруу ургъан кезиуде уа адамны къысха заманны ичинде больницагъа жетдирирге, халин тинтирге, аурууну тюз тохташдырыргъа керекди. Битеу бу жумушланы терк тамамларгъа керекди. Республикалы больницада саусуз бери тюшген кезиуден башлап, реабилитациягъа дери толу болушлукъ бериледи. Хирургия, ызы бла бардырылгъан реабилитация саусузлагъа аягъы юсюне болургъа болушады. Республикада жюрек-къан тамырланы аурууларындан ауушханланы саны азая баргъаны къууандырады. Ол а жангы технологияла сингдирилгенлерини, керекли онгла къуралгъанларыны хайырынданды,-деп чертгенди спикер.
Татьяна Борисовна кёргенине ыразы болгъанын айтханды. Депутатла саулукъ сакълау учрежденияда къуралгъан онгла, оборудования бла шагъырейленнгендиле. Спикер регионда медицина мындан ары да айнырыгъына ишексиз болгъанын, инсанла башха жерлеге бармай, бийик технологиялы болушлукъну жеринде алгъанларына ыразылыгъын айтханды.
- Мынан ары къаллай жумушла тамамларгъа кереклиси белгилиди. Медиклени билимлери, шёндюгю болумланы ангылагъанлары къууандырады. Битеу мадарла республикада медицинаны айнытыугъа бурулупдула. Биз а керекли законла бла жалчытырча мадарла этерге хазырбыз,-дегенди Татьяна Егорова.
Депутатла РКБ-да сингдирилген жангы амалла бла шагъырей болгъандыла. Саусузла келген бёлюм а ючге юлешинипди: жашил, сары эм къызыл. Жашил бёлюмде регистратура, болушлукъну сакъларча жерле, тинтиу бардырылгъан отоула бардыла.
Сары бёлюмде уа терк медицина болушлукъ служба келтирген саусузлагъа къарайдыла. Анда УЗИ-кабинет, рентген, томограф бардыла. Къызыл бёлюмде уа ауруулары къыйыннга айланнганлагъа къарайдыла. Мында он адамгъа жер къуралгъанды. Алайдан диагностика кабинетлеге, реанимациягъа да тыйгъычсыз ётерге онг барды.
КъМР-ни саулукъ сакълау министри Рустам Калибатов битеу бу жумушланы хайырындан медицина болушлукъ терк берилгенин айтханды. Къабарты-Малкъарда бу амалла къыралда биринчилени санында сингдирилгенлерин белгилегенди ол.
Къан тамырланы арасыны башчысы Заурбек Кожаев мыйыны къан бла жалчытыу бузулгъанда, саусузгъа болушлукъ къысха заманны ичинде берилгенин билдиргенди: анализле аладыла, КТ-диагностика бардырадыла, битеу жумушланы 35 минутну ичинде толтурадыла. Алай бла «алтын сагъат» сакъланады. Тромб ачыкъланса, тийишли дарман салынады, ол а къанны уюгъанын кетереди.
Депутатлагъа рентгенэндоваскулярный хирургияны юсюнден да айтхандыла. Ол а къан тамырланы ишлерин жангыртыргъа болушады.
Тюбешиуню кезиуюнде профилактиканы, къан тамырланы тинтиуню, кадрла бла жалчытыуну соруулары да сюзюлгендиле. Ахырында Татьяна Егорова медиклеге республиканы халкъыны саулугъун сакълаугъа салгъан къыйынлары ючюн ыразылыгъын айтханды эмда жетишимле тежегенди.
Мындан ары бу сорууну 25 ноябрьде Парламентде сюзерге белгиленеди.
КъМР-ни Парламентини
пресс-службасы.
