Бу кюнледе Къабарты-Малкъар гуманитар-техника колледжде «Тенгликде сёлешиу» деген ат бла тюбешиу ётгенди. Окъуучулада къонакъда Къырал Думаны Къабарты-Малкъардан депутаты Виктория Родина болгъанды.
Ушакъны кезиуюнде кёп затны юсюнден сёз баргъанды, алай бек магъаналыгъа санларында къыяулары болгъанланы жамауат жашаугъа тири къатышдырыу бла байламлы соруу болгъанды. Виктория Родина саулукълары бла байламлы чекленнген онглары болгъан инсанлагъа окъургъа, усталыкъ алыргъа дунияны башында къаллай онгла къуралгъанларыны юсюнден юлгюле келтирип айтханды. Ол ишде къаллай чырмаула тюбегенлерини, аладан къалай къутулургъа кереклисини юсюнден да билдириуле этгенди.
Колледжни окъуучулары ушакъгъа тири къатышхандыла. Ала билим бериуде жангычылыкъланы, санларында къыяулары болгъанла усталыкъ алып чыкъгъандан сора къайда ишлерге боллукъларыны, Къабарты-Малкъарда «Абилимпикс» къымылдау мындан ары да айнырча не этерге кереклисини юсюнден да билирге сюйгендиле.
Гуманитар-техника колледж аллай ушакъланы майданына бошдан сайланмагъанды: ол РФ-де болгъан аллай 160 окъуу юйню арасында эм иги онусуну санына киреди, регионда уа алчыгъа саналады.
Ресурс окъуу-методика ара сакъатланы окъутууда, юйретиуде иги да алгъа уллу атлам этгенин да чертирге тийишлиди.
Тюбешиуге гуманитар-техника колледжни директору Барасби Абазов, «Единая Россия» политика партияны регион бёлюмюню толтуруучу секретары Анжела Адыгеунова, урунуу эмда социал къоруулау жаны бла республикалы араны бёлюмюню таматасы Руслан Эльмесов, ВОРД-ну регион бёлюмюню председатели Бёзюланы Марина, колледжни директоруну орунбасары Марина Бербекова, бёлюмню башчысы Сатаней Курашева, дагъыда башхала къатышхандыла.
Ахырында Виктория Родина Барасби Абазов, Сатаней Курашева, дагъыда къауум адам саусуз, санларында къыяулары болгъан сабийлени юйретиуге, окъутуугъа уллу къыйын салгъанлары ючюн «Единая Россия» политика партияны грамоталары бла саугъаланнганларын билдирип, аланы алагъа бергенди.
Холаланы Марзият
