Кёп болмай Элбрус районну администрациясыны башчысы Отарланы Мухтар  ишчи жолоучулугъуну чеклеринде «Эллени хар жаны бла да  айнытыу» федерал программагъа кёре  тынгылы ремонт этилген социал магъаналы объектлени жокълап, болумлары бла  шагъырейленнгенди.    
Тырныауузда В. Губановну атын жюрютген «Геолог» спорт-саулукъну кючлеу комплекс аладан бириди.  Аны жангыртылырын шахарчыла, районда жашагъанла да ашыгъып сакълайдыла.   Мында спортну  волейбол, футбол, карате, бокс, женгил эм ауур атлетика, гимнастика дегенча тюрлюлеринден жараула бардырыладыла. Аны бла бирге республиканы, округну, Россейни да биринчиликлери бла чемпионатлары ётедиле.
Бюгюнлюкге араны ичин, тышын да жангыртып бошай турадыла, ол санда   хауа, жылыу берген ызла да алышындырылгъандыла.  Андан сора да, спорт майданла, тренажёр залла бла  спортчула кийиннген жерле да тапландырыллыкъдыла эм жангы оборудование бла   жалчытыллыкъдыла.
Ол кюн Отар улу улоула тохтаучу жерлеге да къарагъанды. Аланы игилендириу   «Миллет стрит-арт: орамланы маданияты» деген  проектни чеклеринде бардырылады. Аны КъМР-ни Миллетлени ишлери эмда жамауат проектле жаны бла министерствосуну болушлугъу бла Хаджиланы Даниялны атын жюрютген «Турна» маданият ара тамамлайды. 

Магометланы Сулейман хазырлагъанды.