КъБР-м щыIэ МВД-м зэхыхьэ гуапэ щекIуэкIащ Урысей Федерацэм Къэрал кIуэцI IуэхухэмкIэ и органхэм я лэжьакIуэм и махуэм и щIыхькIэ.
Абы хэтащ Къэбэрдей-Балъкъэр Республикэм и Iэтащхьэ КIуэкIуэ Казбек, КъБР-м и Парламентым и УнафэщI Егоровэ Татьянэ, КъБР-м и Парламентым Жылагъуэ шынагъуэншагъэмрэ Iулъхьэм пэщIэтынымкIэ и комитетым и унафэщI Кривко Михаил, ЩэнхабзэмкIэ, жылагъуэм зегъэужьынымрэ хъыбарегъащIэ IуэхухэмкIэ комитетым и унафэщI Текуев Iэмырбий, КъБР-м Экономикэ, жылагъуэ шынагъуэншагъэмкIэ и советым и секретарь Тату Казбек, КъБР-м и федеральнэ инспектор Васильченкэ Дмитрий, КъБР-м къэрал кIуэцI IуэхухэмкIэ министру щыIэ Крючков Вячеслав я пашэу ведомствэм и унафэщIхэр, КъБР-м и Парламентым и депутат, дзэ Iуэху хэхам и ветеран Шевчук Герман, «Хэкум и хъумакIуэхэр» фондым и щIыналъэ къудамэм и унафэщI Дадэ МуIэед, КъБР-м щыIэ МВД-м и Жылагъуэ советым, республикэ ОВД-м и ветеранхэм я щIыналъэ жылагъуэ зэгухьэныгъэм я унафэщIхэу Мэкъушэ Русланрэ Пыхъ МуIэедрэ, Къэбэрдей-Балъкъэр гуманитар-техникэ колледжым и унафэщI Абазэ Барэсбий, апхуэдэуи полицэм и кадет классхэм, гуманитар-техникэ колледжым щIэсхэр.
Къэбэрдей-Балъкъэр Республикэм и Iэтащхьэ КIуэкIуэ Казбек къызэхуэсахэм ехъуэхъуащ.
- Мы махуэшхуэр хабзэр зыхъумэ икIи цIыхухэм я шынагъуэншагъэр къызэзыгъэпэщхэм, хьэлэлу зи къалэнхэр езыхьэкIхэм, къэралым, и лъэпкъым пэжу хуэлажьэхэм я дамыгъэщ. Къэрал кIуэцI IуэхухэмкIэ органхэм я лэжьакIуэхэм я хьэл-щэн нэхъыфIхэр къагъэлагъуэ, щIэпхъаджагъэм пэщIэтыным хуэгъэза лэжьыгъэр махуэ къэс ирагъэкIуэкI. Хэхауэ фи лэжьыгъэм мыхьэнэшхуэ иIэщ террор шынагъуэр гъэмэщIэнымкIэ. А псори хуощхьэпэ законностымрэ хабзэмрэ гъэбыдэным. Си фIэщ мэхъу мыхьэнэшхуэ зиIэ къалэнхэу фи пащхьэ къиувэхэр адэкIи щIыхь пылъу зэрывгъэзэщIэнур, - къыхигъэщ КIуэкIуэ Казбек.
КъБР-м и Iэтащхьэм фIыщIэ псалъэ хэхахэр яжриIащ ветеранхэм икIи къыхигъэщащ лэжьакIуэщIэхэр гъэсэным абыхэм уасэ зимыIэ хэлъхьэныгъэ зэрыхуащIыр.
Къызэхуэсахэм защыхуигъазэм, полицэм и генерал-лейтенант Крючков Вячеслав къеджащ Урысей Федерацэм къэрал кIуэцI IуэхухэмкIэ и министр, полицэм и генерал Колокольцев Владимир махуэшхуэм теухуауэ къахуигъэхьа псалъэ гуапэхэм.
- Иджырей щытыкIэм мыхьэнэшхуэ иIэщ ди къару псори щIэпхъаджагъэм пэщIэтыным ехьэлIэным. Сэ къызбгъэдэкIыу ди гупым фIыщIэ яхуэсщIыну сыхуейщ махуэ къэс хьэлэлу ирахьэкI лэжьыгъэм, я IэщIагъэм зэрыхуэIэижьым, я къулыкъум къыщагъэлъагъуэ лIыхъужьыгъэм папщIэ, - къыхигъэщащ Крючков Вячеслав.
Министрым фIыщIэ яхуищIащ Къэбэрдей-Балъкъэр Республикэм и Iэтащхьэ КIуэкIуэ Казбек, КъБР-м и Парламентымрэ къарузехьэ IэнатIэмрэ я унафэщIхэм, зэрызыкъыщIагъакъуэмрэ къазэрыдэлажьэмрэ папщIэ.
Хабзэхъумэхэм ехъуэхъуащ КъБР-м и Парламентым и УнафэщI Егоровэ Татьянэ.
Iуэхум пащэу, дамыгъэ лъапIэхэр зыхуагъэфэщахэм иратащ.
Республикэм и Парламентым фIыщIэ тхылъхэр иратащ ведомствэм и лэжьакIуэ къыхэжаныкIахэм. Абыхэм ящыщщ Урысей МВД-м и Налшык управленэм и Къэрал автоинспекцэм и гъуэгу-плъыр къулыкъум и инспектор, полицэм и лейтенант Слъон Азнаур, 2025 гъэм бадзэуэгъуэм и 4-м Налшык къалэм бзаджащIэхэр къыщытеуэу уIэгъэ хьэлъэ зыгъуэтауэ щытар.
Крючков Вячеслав «Хабзэм и хъумакIуэ нэс зэрагъэсам папщIэ» фIыщIэ тхыгъэ яритащ Слъоным и адэ-анэм - Чамил и къуэ Зауррэ Хьэжысмел ипхъу Марьянэрэ, апхуэдэуи полицэм и лейтенант, Урысей МВД-м и Налшык Управленэм и ДПС-м и инспектор Къаныкъуэ Астемыр и адэ-анэ Мухьэмэд и къуэ Iэниуаррэ Къэралбий ипхъу Маритэрэ.
«МВД-м щIыхь зиIэ и лэжьакIуэ» бгъэхэIу дамыгъэр хуагъэфэщащ къэрал кIуэцI IуэхухэмкIэ министру КъБР-м щыIэм и къуэдзэ, полицэм и полковник Мамхэгъ Назир.
ЛэжьакIуэ, ветеран зыбжанэм иратащ дамыгъэ лъапIэхэр, абы Урысей МВД-м и медалхэри хыхьэу: Путилиным и цIэр зезыхьэ, «За доблесть в службе», «За боевое содружество» жыхуиIэхэр, «За отличную службу в МВД 2-й степени» бгъэхэIу дамыгъэр, апхуэдэуи Урысей МВД-м, КъБР-м щыIэ МВД-м я ЩIыхь тхылъхэр.
«Хабзэр гъэбыдэным хуищIа хэлъхьэныгъэм папщIэ» медалыр иратащ «Лэгъупыкъу» сабий социальнэ центрым и унафэщI, полицэм и полковник Тембот Владимир.
Къэбэрдей-Балъкъэрым щыIэ МВД-м и къудамэхэм я лэжьакIуэу щым я щхьэгъусэхэм Крючковым яритащ «МВД-м и лэжьакIуэм и фызым» медалыр.
Къызэхуэсахэм я гукъыдэжыр къаIэтащ хэкупсэ уэрэдхэр зыгъэзэщIа, Ингуш Республикэм щIыхь зиIэ и артист, Къэбэрдей-Балъкъэрым и цIыхубэ артист Текуев Iэмырбий, уэрэджыIакIуэхэм я зэпеуэхэм я лауреат Балъкъыз Тимур, «Кадет вальс», Тэрч къэзакъхэм уэрэдымрэ къафэмкIэ я ансамблхэм щыщхэм, апхуэдэуи «Каллисто» театрым, Налшык къалэ гъуазджэмкIэ и сабий школ №1-м и гъэсэнхэм, полицэм и кадет классым щеджэхэм, КъБР-м щыIэ МВД-м и лэжьакIуэхэм.
Зыгъэхьэзырар УЭРДОКЪУЭ Женящ.
