ДэнэкIи хуэдэу, ди республикэм и курыт школхэм мы зэманым щокIуэкI гъуэгу хабзэхэр гъэзэщIэным, лъэсрызекIуэм и шынагъуэншагъэр хъу-
мэным теухуа лэжьыгъэ щхьэпэхэр. Мыхьэнэшхуэ зиIэ а Iуэхугъуэм хэхауэ хуолажьэ «Гъуэгу шынагъуэншагъэмкIэ лабораторэм» и IэщIагъэлIхэр.
Къыхэдгъэщынщи, ар Iыхьэ куэду зэхэт къэрал программэ щхьэхуэщ. И къалэнхэри епхащ сабийхэмрэ ныбжьыщIэхэмрэ зыхэт гъуэгу насыпыншагъэр нэхъ мащIэ щIыным, апхуэдэхэр къэмыхъун папщIэ щIэблэм егъэджэныгъэ лэжьыгъэхэр ядегъэкIуэкIыным. А проектыр илъэс зыбжанэ хъуауэ ягъэзащIэ, УФ-м и МВД-м и Къэрал автомобиль инспекцэм, УФ-м Егъэджэныгъэрэ щIэныгъэмкIэ, ТранспортымкIэ и министерствэхэм даIыгъыу. IэнатIэм и къудамэхэр ди къэралым и щIыналъэ псоми щолажьэ.
Апхуэдэ къалэнхэр я пщэ дэлъу «Гъуэгу шынагъуэншагъэмкIэ лабораторэм» ди республикэм щиIэ къудамэм и IэщIагъэлIхэм мы зэманым лэжьыгъэ щхьэпэхэр щрагъэкIуэкI щIыналъэм и щIыпIэ зэмылIэужьыгъуэхэм. Апхуэдэу IэщIагъэлIхэр иджыблагъэ щыIащ Iуащхьэмахуэ районым хыхьэ Гундэлэн жылэмрэ Бахъсэн щIыналъэм хиубыдэ Къулъкъужын Ипщэ къуажэмрэ дэт курыт школхэм. НыбжьыщIэхэр Iуэхум хаша нэужь, нэрылъагъу Iэмэпсымэхэр къагъэсэбэпурэ, гъуэгу шынагъуэншагъэр къызэгъэпэщынымкIэ лэжьакIуэхэр елIэлIащ гъуэгум тет сабийхэм абы щызекIуэ хабзэхэр гъэзэщIэным мыхьэнэшхуэ зэриIэр къагурыгъэIуэным. Дауи, гъуэгу щэнхабзэ зыхэлъ лъэсрызекIуэ бгъэсэныр Iуэху тыншкъым, атIэми абы и мыхьэнэр нэхъ иныж мэхъу сабийр езыр и закъуэ школым къэкIуэни унэм кIуэжыни хуей хъумэ. Псом хуэмыдэу бжьыхьэ зэманым - пасэу пшапэр щызэхэуэм.
ШколакIуэхэр гъуэгум къыщыхъу транспорт къэхъукъащIэхэм щыхъумэным хуэгъэпсауэ щытащ еджапIэхэм щекIуэкIа дерсхэри. Хабзэхъумэ лэжьакIуэхэм школакIуэхэр гъуэгу хабзэхэм щыгъуазэ хуащI къудей мыхъуу, дэтхэнэми Iэмал иратащ лъэсу гъуэгум тет хуэдэу къыщагъэхъуну, щытыкIэ къызэрымыкIуэ ихуэмэ, я щхьэр зэрахъумэнум, лей къызытехьа щыIэ хъумэ, абы япэ медицинэ дэIэпыкъуныгъэ зэрыратынум хуагъасэу.
ГъащIэм щыщ щапхъэ нэрылъагъухэр къахьурэ, инспекторхэр апхуэдэу тепсэлъыхьащ жылагъуэм щызекIуэ хабзэхэр ныбжьыщIэхэм къызэпемыгъэудыным. ЗэIущIэм и кIэухыу абыхэм жэуап иратащ ныбжьыщIэхэр зыгъэпIейтей упщIэ псоми.
ТАМБИЙ Линэ.
