Республиканы маданият министри Мухадин Кумахов Россейни Жазыучуларыны союзуну башчысыны регионлада бёлюмле бла ишлеу жаны бла орунбасары Антон Чешукин эмда миллет адабиятла бла кёчюрмеле жаны бла сопредседатели Мамед Халилов бла ишчи тюбешиу бардыргъанды.

Ушакъгъа Къабарты-Малкъарны Жазыучуларыны биригиуюню башчысы Байтуугъанланы Исмайыл, аны орунбасары Лариса Маремкулова да къатышхандыла. Ала регионда адабиятны айнытыуну, бу жаны бла проектлени бардырыуну, союзну республикада бёлюмюню ишин игилендириуню амалларын сюзгендиле. Битеулю халда байламлыкъла жюрютюуге, жангы технологияланы сингдириуге, жазыучуланы башламчылыкъларын жашауда бардырыугъа энчи эс бёлгендиле. Айтылгъаныча, къыралда битеу да 91 регион бёлюм бардыла, республикабыздагъы эм эрттегиледен бириди, быйыл анга 93 жыл толады.   

Ызы бла Антон Чешукин бла Мамед Халилов союзну регионда бёлюмюню правлени бла жыйылыу ётдюргендиле. Анда чыгъармачылыкъны башха-башха тюрлюлери бла кюрешгенле, авторла, литераторла адабиятны шёндюгюлю болумун сюзгендиле, айтхылыкъ жазыучуланы сынамларына таяна, жангы тёрелени къурауну юсюнден сёлешгендиле. 

Антон Чешукинни Байтуугъанланы Исмайыл бла энчи ишчи тюбешиулеринде уа эм уллу магъана адабият кючлени барысын да Россейли союзну тёгерегине жыйыугъа берилгенди. Ала чыгъармачылыкъгъа сейирни къозгъауну, маданият хазнаны ёсе келген тёлюлеге ётдюрюуню, жаш авторлагъа болушууну юсюнден айтхандыла. Белгиленнгенича, союзну дагъыда баш муратларындан бири орус эм миллет тиллени бла адабиятланы сакълауду. Аны ючюн да мадарла этилликдиле.

Кульчаланы Зульфия.