Элбрус районну бир къауум маданият мекямлары «Санатны кечеси -2025» деген битеуроссей акциягъа къатышхандыла. Бу жол аны Халкъны бирлигини  кюнюню байрамына атагъандыла. Алай бла Отарланы Омар атлы краевед музей келгенлеге Басхан ауузуну табийгъатыны байлыгъыны, малкъар халкъны тин хазнасыны, Тырныаууздагъы молибден комбинатны тарыхыны юсюнден хапар айтхандыла. Къонакъланы алларында сёлеше, музейни ишчиси Толгъурланы Фатима кёп миллетлени маданиятларыны байламлыкълары къачан да бек магъаналы шартладан бири болгъанын чертгенди.

Дагъыда «Тауланы бла тарланы къыралында» деген ат бла  бардырылгъан сурат кёрмючге да аслам эс бёлюннгенди. Ингир а «Бирге шуёх юйюр» деген викторина бла бошалгъанды.

Андан сора да, Тырныауузну 3-чю номерли китапханасында да тюбешиу бардырылгъанды. Назмула окъугъандыла, ушакъла бардыргъандыла эм къыралыбызда бирликни белгиси болгъан тукъузгю бутакъны ишлеп, хунерлерин кёргюзтгендиле.

Къасымланы Аминат.