Нальчикде суратлау искусстволаны Андрей Ткаченко атлы музейинде «Санасатны кечеси» кезиулю кере бардырылгъанды. Быйыл ол Халкъны бирлигини кюнюне жораланнганды.
Санасатха бир атлам окъуна этерге сюймеген инсан табаргъа къыйынды. Биз барыбыз да, суратчыла болмагъанлыкъгъа – сурат ишлерге, музыкантла болмагъанлыкъгъа – концертлеге барыргъа сюебиз. Анга Нальчикде музейни ишчилери «Насып чыпчыкъ» деген жамауат организацияны келечилери бла бирге къурагъан иш анга шагъатлыкъ этеди.
Ала къумачха сурат салыуну эм омакъ къошун сауутланы юслеринден дерсле бергендиле, музейге келгенле биринчи чыгъармаларын этгендиле. Москвадан келген къонакъ, гжельни устасы Тани Фирн сейирлик тарых шартла да келтиргенди. Ол байрамгъа къатышханлагъа эрттегили Къытайда фарфор бла устала къалай ишлеп башлагъанларын айтханды. Пётр Первый патчах Голландияда фаянсны кёрюп, Россейде да быллай ариулукъ болурун сюйген эди. 
Алай эте, къыралла, халкъла бир бирлеринден юйрене айныгъандыла. Совет Союзда фарфор фабрикала бар эдиле, ала Виктор Логиновну башламчылыгъы бла ачылгъан эдиле. Тыш къыралладан келгенле бизде чындан адырлагъа сейир этип тургъандыла. 
Ызы бла жырчыланы «Устаз» эмда «Жырлаучу укулеле» къауумла музейге келгенле бла бирге жырлагъандыла.  Анна Галищева уа гинжилери бла салгъан спектаклине къараучуланы да къатышдыргъанды. Сабийле, гинжилени сорууларына жууапла бере, ала бир оюнда, бир жашауда болгъанларына бютюн бек къууаннгандыла.
Назмучула да бу ариу байрамгъа къошумчулукъ этгендиле: Лидия Хуштова «Алтын терек» деген назмусун окъугъанды. 
«Искусстволаны кечесини» ахырында уа Ислам Сатыровну «Испытание аулом» деген фильми кёргюзтюлгенди. Анда жашчыкъ жай солууларында бир айгъа элге аппасына келеди эм кесине сейирлик дуния ачады. Алгъын телефонундан, ноутбугундан айырылмагъан сабий табийгъатны, адамланы, кеси бла тенглени биринчи кере кёргенча болады. 
Музейни ишчиси Елена Ремхен бу байрамгъа келгенле кёрмючлеге жюрюп башларла деп, бек ышаннганын билдиргенди. Хар юйюрде ата-аналаны сабийлери бла бирге музейлерибизге баргъан тёрелери болса, ол ёсюп келген тёлюню юйретиуге уллу къошумчулукъ боллукъду. 

Байсыланы Марзият