Кёп болмай  Нальчикде «КАВКАЗ. РФ» биригиуню таматасыны орунбасары  Тимур Кебековну башчылыгъы бла  кенгеш бардырылгъанды. Анда баш тема  биригиуню республикада  резидентлерин   сынамлы кадрла бла жалчытыугъа аталгъанды, деп билдириледи «Иш кёллю Россей» жамауат организацияны Къабарты-Малкъарда бёлюмюню пресс-службасындан. 

 Жыйылыугъа КъМР-ни Парламентини, Курортла эмда туризм, Урунуу эмда социал къоруулау министерстволаны,   Шимал-Кавказ федерал округда  туризм бёлюмню  кадрла бла жалчытыу ассоциацияны, вузланы,  бизнесни келечилери эм башхала да къатышхандыла. Ол санда  «Иш кёллю Россей» жамауат организацияны Къабарты-Малкъарда бёлюмюню   келечилери  Алексей Войтов,  Мамайланы Галина,  Ксаналаны Расул эм Сумайланы Амир да.

Кенгешде Шимал-Кавказ федерал округда    туризм бёлюмню  кадрла бла жалчытыу ассоциациясы стратегиялы иши бла шагъырейлендиргенди. Ызы бла  «КАВКАЗ. РФ»  биригиуню резидентлери эм башхала  да  оюмларын  айтып сёлешгендиле.

Экспертле атханнга кёре, 2030 жылгъа  регионда экономиканы къыйматлы бёлюмлеринде, ол санда туризмде,   урунурча  жюз минг адам керек боллукъду. Эсге сала айтсакъ, бюгюнлюкде  Къабарты-Малкъаргъа  туризм бёлюмге аслам  инвестиция этилмегени да сынамлы кадрланы  жетмегенлеринденди.

Аны себепли  ассоциацияны кючю бла  бёлюмге билимли бийик квалификациялы кадрла хазырларча иш башланырыкъды. Аны кезиуюнде билимлерин ёсдюрюрча эм  сынамларын  кючлерча да комплекс халда мадар этилликди. Аллай амал   жаш адамлагъа усталыкъ сайларгъа да болушурукъду.

Магометланы Сулейман.