Кёп болмай «Жашау этерча инфраструктура» миллет проектге кёре «Прохладный-Эльбрус» трассадан Нейтриногъа элтген Губасанты жолгъа тынгылы ремонт этилип бошалгъанды. Жангыртыу ишле 1,5 километр тенгли бирде тамамланнгандыла, деп билдиредиле КъМР-ни Транспорт эмда жол мюлк министерствосуну пресс-службасындан.
Огъары Басханда дунияда биринчи Нейтрино обсерватория ишин 1973 жылдан бери бардырады. Ол Ындырчы тауну ичинде эм жерни теренинде орналады. Аны баш борчу нейтрино кесеклени тутаргъа эм тинтирге.
Бюгюнлюкде да алимле проектге аслам эс бурадыла эм илму жаны бла уллу иш бардырадыла. Жолну, обсерваторияны ишчилеринден сора да, туристле эм элде жашагъанла да кюн сайын хайырланадыла. Мында иги кесек жашау журт, медицина ара эм от ёчюлтюучю бёлюм да орналадыла.
– Ремонт ишлени кезиуюнде жолну мурдору кючлендирилгенди, кенгертилгенди, бордюрла салыннгандыла эм жангы излемлеге кёре къалынлыгъы 7 эм 5 сантиметр чакълы болгъан эки къат асфальт жайылгъанды. Биринчи кере жаяу жолчукъ да ишленнгенди.
Аны бла бирге къоркъуусузлукъну жалчытыугъа да тийишли халда эс бурулгъанды. Ол санда темир буруула, токну аз къоратхан чыракъла, жорукъ белгиле, ызла да жарашдырылгъандыла.
Саулай алып айтханда, ишле, къыйын тау жерледе баргъанларына да къарамай, болжалдан кеч къалмай тамамланнгандыла. Мында ауур жюкле ташыгъан машинала аз жюрюгенлери себепли, ол иги кесек заманны тозурамай мычырыкъды,- дегенди жол мюлк управленияны къурулуш, реконструкция эм ремонт этиу бёлюмюню тапматасыны орунбасары Мухадин Жемухов.
Эсге сала айтсакъ, «Жашау этерча инфраструктура» миллет проектни магъанасы – Россейни инсанларыны болумларын игилендириргеди, жолла тап эм къоркъуусуз болурча этергеди. Аны ючюн тынгылы материалла бла къыйматлы технологияла хайырланыладыла. Битеу ишле болжалдан кеч къалмай эм тынгылы толтурулурларына къыралны жанындан специалистле эм жамауат организацияланы келечилери дайым кёз-къулакъ болгъанлай турадыла.
Курданланы Сулейман.
