КъБР-м Курортхэмрэ туриз­мэмкIэ и министерствэм и жэрдэмкIэ, жэпуэгъуэм и 28-м республикэм щекIуэкIащ «Туризмэр. ЦIыхухэр. ЕхъулIэныгъэхэр» зы­фIаща, щIыналъэ зыбжанэ къы­зэ­щIэзыубыда зэIущIэшхуэ. Республикэм и Iэтащхьэ КIуэкIуэ Казбек абы кърихьэлIа хьэщIэхэр иригъэблэгъащ. 

Зэхуэсым хэтын папщIэ, Къэбэрдей-Балъкъэрым къэкIуащ Сы­быр федеральнэ университетым (СФУ) ГастрономиемкIэ и институтым и унафэщIым и къуэдзэ, а еджапIэ дыдэм хиубыдэ, IэщIагъэ щрат центрым и унафэщI Мягковэ Еленэрэ «СФУ-м гастрономиемкIэ и еджапIэ» проектым и унафэщI Баховэ Натальерэ. КъБР-м и Iэтащ­хьэм иригъэкIуэкIа зэIущIэм хэтащ республикэм курортхэмрэ туризмэмкIэ и министр Быф Ас­кэр. ЩIыналъэм хьэщIагъэ хабзэхэм зэрызыщаубгъум, ар иджы­рей туризмэм и индустрием и зы Iыхьэ зэрыхъум, щIэныгъэм хэгъэхъуэн зэрыхуеймрэ Iуэхум хэгъуэзахэм щапхъэ къазэрытехыпхъэм­рэ тепсэлъыхьащ зэхуэзахэр. КIуэ­кIуэ Казбек абыхэм ехъуэхъуащ я зэманыр щхьэпагъ хэлъу ирахьэкIыну, дэтхэнэ зыми и лэжьыгъэм ехъулIэныгъэ щиIэну. 
Зэхуэс екIуэкIам гулъытэшхуэ щратащ «Туризмэмрэ хьэщIэ егъэб­лэгъэкIэмрэ» лъэпкъ проектыр гъэзэщIа зэрыхъум, хабзэн­шагъэ хэлъу туризмэм щекIуэкI Iуэхугъуэхэр ягъэмэщIэн папщIэ, ирахьэлIэ Iэмалхэм, Iуащхьэмахуэ лъапэмрэ Налшыкрэ дэт зыгъэпсэхупIэхэм зегъэужьын зэры­хуейм. Туризм къудамэм епхауэ ла­жьэ IэщIагъэлIхэр нэхъыбэу ягъэ­­хьэзырын мурад зэраIэри къыхагъэщащ. ЗэIущIэм хэтахэр зэ­дэгуэшащ щхьэж и лэжьыгъэм къыщехъулIахэмкIэ, дяпэкIэ гулъытэ нэхъ зыхуащIыпхъэхэми тепсэлъыхьащ. 
КъБР-м Курортхэмрэ туризмэмкIэ и министерствэм, СФУ-м ГастрономиемкIэ и институтым, а еджапIэм къыдэлажьэ нэгъуэщI зы IуэхущIапIэм зэгурыIуэныгъэ зэ­­ра­щIылIащ. Зэхуэсым и кIэм Къэ­бэрдей-Балъкъэрым туризмэм зыщиужьыным хэлъхьэныгъэшхуэ хуэзыщIа лэжьакIуэхэмрэ IуэхущIапIэхэмрэ тыгъэ лъапIэхэр иратащ.