Нальчикде Универсал спорт арада  Ахмед Жилетежевни хурметине  эркин тутушуудан битеуроссей эришиу бардырылгъанды. Анда эки кюнню ичинде майдалла ючюн къыралыбызны жыйырма беш шахарындан юч жюзге жууукъ гёжеф сынашхандыла. 

Атлетле къарыуларын 65 килограмм ауурлукъдан башлап 125 килограммгъа дери къауумлада сынагъандыла. Республикабызны келечилери тёрт майдалгъа тийишли болгъандыла – эки кюмюш бла эки доммакъ. Экинчи жерлеге Гергъокъланы Саид (65 кг) бла Кантемир Гешев (86 кг) чыкъгъандыла, Къарчаланы Азрет (86 кг) бла Алихан Канаметов (86 кг) ючюнчюле болгъандыла. Гёжефлени тренерле Арсен Закуев, Ажоланы Азамат бла Закирей Жолдашев хазырлагъандыла. 

19-жыллыкъ гёжеф Ахмед Жилетежевни хурметине бу эришиу ючюнчю кере къуралады. Аны жууугъу эмда эришиулени баш судьясы Инал Хаников айтханына кёре, Ахмед низамлы, муратына таймай баргъан, Олимпиаданы «алтынын» алыргъа мурат этген инсан эди. «Алай къадары башха болгъанды, жашауу жашлай юзюлгенди. Аны эсде тутууну белгисича, онг болгъан къадарда, юйюрю, жууукъ-ахлулары битеуроссей эришиуню дайым бардыргъанлай турлукъдула», – дегенди ол.