Озгъан ыйыкъда Тырныауузну Къулийланы Къайсын атлы Маданият юйюнде жашауларын Ата журтха къуллукъ этиу бла байлагъан жашларыбызны хурметлерине патриот жырны ингири къуралгъанды: Ата журтну къоруулаучусуну жылыны чеклеринде «Бирликдеди сени кючюнг, деменгили Россей» деген ат бла аламат концерт кёргюзтюлгенди.
Ол ингирни сыйлы къонакълары Къыралны къоркъуулу кезиуюнде аны къоруулаууна арсарсыз чыгъаргъа кючлери, кишиликлери да жетген жашларыбыз эдиле, ол санда афган урушну ветеранлары, энчи аскер операциягъа къатышхан жигитлерибиз да. Аланы аскер къуллукъда жоллары ёсе келген кёп тёлюге юлгю болгъанлай къаллыкъдыла. Биз а бюгюн ала бла ёхтемленебиз, аллай жашланы ёсдюрген аталагъа бла аналагъа ыспас этебиз.
Концертни Маданият юйню жаш сохталары Тохаланы Ильнара бла «Сопрано +» деген жыр студия ачхандыла. Ала, жырларыны хар сёзюн жюреклеринден ётдюре, болмагъанча ариу номер кёргюзтгендиле.
Сёз Элбрус районда Афган урушну ветеранларыны советини таматасы Князланы Алимге берилгенде, ол жыл сайын, унутмай, быллай аламат байрамла къурагъан Маданият управленияда ишлегенлеге ыразылыгъын билдиргенди. Ёсе келген тёлюню жюреклерине Ата журтха сюймеклик сингдириу, аны кючлеу да быллай ариу жумушладан башланнганын айтханды.
- Бирликде кючлю болгъаныбызны аскерчиле туугъан жерлеринден узакъда бютюн бек сезедиле. Аны себепли быллай тутхучлулукъну магъанасы уллуду. Жюреклеринде патриот сезимге жер тапханла къыралларыны чынтты жашлары болуп ёсерикдиле. Биз ала бла кёп кере ёхтемлениригибизге ийнанама, - дегенди ол.
Андан ары сёз энчи аскер операциягъа къатышхан Шамурзаев Батайгъа берилгенди. Ол да жамауат къазауатдагъы жашланы бек кёллендиргенин, ол а алагъа кюч-къарыу бергенин чертгенди.
- Жашларыбыз ёлюм бла бетден бетге хар кюнден тюбеше, батырлыкъларын кёргюзтедиле. Кёпле къыралны жалынчакъсызлыгъы ючюн жанларын да аямагъандыла. Жигитлени юйюрлерине сабырлыкъ тилей, жюрек ыразылыгъыбызны билдиребиз. Саулай да къырал аланы атларын унутурукъ тюйюлдю.
Тёлюлеге юлгюдюле, кеси кючлерине ийнандыргъан шагъатлыкъдыла. Хорлау бизники болуруна ишексизбиз. Сабийлени бизге жазгъан къагъытлары мудахлыгъыбызны чачадыла. Бек багъалы кёрюнедиле. Жамауат жыйып жиберген болушлукъ да хычыуунду. Аны бла биз керти да бирлеше билгенибизни кёргюзтебиз. Бирликдеди кючюбюз! - дегенди ол.
Андан сора Багъатырланы Малика, зынгырдауукъ ауазчыгъы бла жырлап, къонакъланы кёллерин кётюргенди.
Ызы бла сёз Элбрус районну жаш тёлю арасыны таматасы Этезланы Асланнга берилгенди. Ол да харкюнлюк ишлерини баш мураты сабийлени патриот сезимлерин кючлеу болгъанын айтханды. Аны ючюн арада, андан тышында да кёп жумушла бардырылгъанларын черте, аламат жаш тёлю ёсе келгенин белгилегенди. Аскерчилерибизге ыспас эте, аланы юлгюлеринде тёлюле ёсдюрюрге хазырлыкъларына ышандыргъанды.
Ёзденланы Танзиля бла бирге саулай къараучула да аскер жырланы бир кесеклерин айтхандыла. Уллу, гитче да кёлден билген, сюйген жырларын эсгергендиле.
Къайсы къазауатда да аскер къарындашлыкъ бек багъалыды. Къыйын кезиуде жаланда къарындаш болгъан тенгинг жетеди къатынга. Жаралы болсанг да, сыртына салып, сюркелип, отдан чыгъарыргъа таукелленнген да аскер къарындаш болады. Андан сора уа юйюрю, жууукъларыны бла ахлуларыны ашыгъып сакълагъанлары аны жанын кёп кере сакъларгъа болушадыла. Бу барысы да сюймекликди. Къарындаш, ата-ана, эгеч-къарындаш, таныш-тенг сюймеклик.
Тебердиланы Арнелла «Ол жаз башыны юсюнден» деген жырны айтханда, кёплени кёллери толгъан эди. Быллай жырла жаш адамланы да сезимлерин къозгъайдыла.
Дагъыда Гаджиланы Диананы, Атмырзаланы Жаннаны бла Жазаланы Нурияны, Гызыланы Айланы, Аракелов Тимурну, Черкесланы Айланы аламат жырлагъанлары, «Феникс» той-оюн къауумну тепсегенлери ингирге бютюн къууат бергендиле.
Тюзлюк ючюн, хорлау ючюн, мамырлыкъ ючюн, туугъан жерибиз ючюн Россей кеси тарыхында кёп урушлагъа бла сынаулагъа жолугъа келгенди. Алай бир заманда да жауну аллында баш бюкмегенди, къоркъмагъанды, къачмагъанды. Ма олду бизни тамблабызны юлгюсю, тюненебизни уа ёхтемлиги!
Темуккуланы Асият.
