КъБР-м и Iэтащхьэ КIуэкIуэ Казбекрэ Минеральные Воды къалэм щекIуэкI зэхуэсыр зэхьэлIа ди къулыкъущIэхэмрэ дыгъуасэ яIущIащ Къэрал гъуэгу агентствэм и унафэщI Новиков Роман Вит­алий и къуэм.

Абы республикэм и УнафэщIыр щы­те­псэлъыхьыжащ интернетым щиIэ напэкIуэцIым.
«Мыхьэнэшхуэ зиIэ Iуэху зыбжанэм я гугъу щытщIащ зэIущIэм. Къапщтэмэ, ды­къытеувыIащ Iуащхьэмахуэ щIыналъэм щедгъэкIуэкI гъуэгу лэжьыгъэхэм, абыхэм гъэмахуэ кIуам Тырныауз ятIэпс къыщы­дэуам ар зэран зыхуэхъуахэр ­зэ­гъэ­пэ­щыжынри яхэту, - дыкъыщоджэ тхыгъэм. - Апхуэдэу дытепсэлъыхьащ ­туристхэр жы­джэру здэкIуэ, абы ипкъ иткIи зи экономикэр жыджэру ефIакIуэ Шэрэдж щIына­лъэм и гъуэгухэм зегъэужьынми.
Гъуэгухэр шынагъуэншэу икIи щызе­кIуэгъуафIэу щытын хуейщ. Ухуэныгъэхэм ящыщ зыщ къэрал гъуэгум щыщ Iыхьэу Аруан - Балъкъэр Ипщэ - Уштулу жылэхэр къызэщIэзыубыдэр, километ­ритху зи кIы­хьагъыр. ИджыкIэ абы мы­вэкIэщхъ телъу аращи, ди мурадщ абы асфальтрэ бетонрэ зэхэлъу тетлъхьэну, абы епха инфраструктурэми зедгъэ­хъуэжыну. Щхьэхуэу къыхэзгъэщынщ, «ГъуэгуфI шынагъуэн­шэхэр», «ГъащIэм хуэщIа инфраструктурэ» лъэпкъ проект-хэу ди Президентым къы­хилъхьахэм я фIыгъэкIэ, Къэбэрдей-Балъкъэр Рес­пуб­ликэм и гъуэгу IэнатIэм зэи къэмы­хъуауэ зедгъэужьыну Iэмал зэрыдиIэр. 
Гъуэгухэр щIыналъэ, къалэ псоми,  уеблэмэ ди къуажэ нэхъ пхыдзахэми щызэ­рагъэпэщыж. Илъэсихым къриу­быдэу ­тху­зэ­фIэкIащ автомобиль гъуэгуу километр 1200-м щIигъу къэдгъэ­щIэрэ­щIэ­жын, километр 400-м уэздыгъэхэри щы­фIэддзащ.
Гъуэгу лэжьыгъэхэр зэкIэлъыкIуэу, псын­щIэу ирагъэкIуэкI, абы пыщIа нэ­гъуэщI Iуэхухэри къыдагъакIуэу.
Мы илъэсым и закъуэ мардэхэм тету ­гъуэгу ухуэныгъэ 50 идогъэкIуэкI, псори зэ­хэту километр 84-рэ къызэщIаубыдэу, лъэ­мыжу 14, абыхэм ящхьэщыкI гъуэгу­хэм­рэ зэблэкIыпIэхэмрэ яхэту.
Урысейм ТранспортымкIэ и министерствэм, Къэрал гъуэгу агентствэм, «Кавказ» Управленэм фIыщIэшхуэ яхузощI ­гулъытэ къызэрытхуащIым, сэбэпышхуэ ­пы­лъу ды­зэрызэдэлажьэм папщIэ. А лэ­жьыгъэм и фIыгъэкIэ республикэм щып­сэу­хэмрэ абы и хьэщIэхэмрэ гъуэгу шы­нагъуэншэхэр, тыншхэр яIэщ, цIыхухэм я псэукIэр йо­фIа­кIуэ».
КIуэкIуэ Казбек а махуэм хуэзащ рес­публикэм и лIыкIуэхэу «Гъуэгу-2025» гъэ­лъэгъуэныгъэм хэтыну Минеральные Воды къалэм кIуахэм.
Абыхэм яхэтащ ди щIыналъэм и гъуэгуухуэ IуэхущIапIэхэм щыщхэр. «Фи лэжьыгъэм и фIыгъэкIэ Къэбэрдей-Балъкъэ­рым кIуэ пэтми нэхъыбэ щохъу гъуэгуфI шы­нагъуэншэхэр», - яжриIащ КIуэкIуэ Каз­бек абыхэм икIи фIыщIэ яхуищIащ я Iэна­тIэм зэрегугъум папщIэ, ехъуэхъуащ зэхуэсым къызэщIиубыдэ программэм я лэжьыгъэр езыгъэфIэкIуэну Iуэху щхьэ­пэхэр къыха­хыну.