Лъэпкъ драмтеатрхэм я «Южная сцена» фестивалыр жэпуэгъуэм и 18-м Налшык и Музыкэ театрым щызэхуащIыжащ. Ар къызэрагъэпэщ УФ-м-рэ КъБР-мрэ Щэн­хабзэмкIэ я министерствэхэм, УФ-м Теат­рым и лэжьакIуэхэм я зэгухьэныгъэмрэ абы и щIыналъэ къудамэхэмрэ.

Фестивалым хэтахэмрэ театреплъхэмрэ фIэхъус гуапэкIэ захуигъэзащ КъБР-м щэнхабзэмкIэ и министр Къумахуэ Мухьэдин. Абы къыхигъэщащ фестивалымкIэ я мурад нэхъыщхьэр - Кавказ Ищхъэрэ федеральнэ щIыналъэм и лъэпкъ театрхэм я лэжьакIуэ­хэм я зэпыщIэныгъэхэр мы IуэхумкIэ ягъэбы­дэныр, щIэблэр театр гъуазджэм драгъэ­хьэхыныр - къазэрехъулIар. 
Фестивалым кърикIуахэр зэхалъхьэжащ гъуазджэмрэ щэнхабзэмрэ я цIыху цIэ­ры­Iуэ­хэр зыхэта къэпщытакIуэ гупым.«Фестива-лым и Гран-при», «Режиссер лэжьыгъэ нэхъыфI», «Сценографие нэхъыфI», «Бзылъхугъэ роль нэхъыфI», «ЦIыхухъу роль нэхъыфI» гуэ­шы­кIэм тету къапщытэри, зи зэфIэкIкIэ къахэщахэм я цIэ къраIуащ икIи саугъэтхэр иратащ.
Абхъазым, Дагъыстэным, Шэшэным, Ингушым, Къэбэрдей-Балъкъэрым, Адыгейм, Къэрэшей-Шэрджэсым, Осетие Ищхъэрэ - Аланием, Осетие Ипщэм я театр нэхъы­щхьэхэм я спектакль нэхъыфIхэр артистхэм мы махуэхэм щагъэлъэгъуащ Щоджэн­-цIыкIу Алий, Кулиев Къайсын я цIэхэр зезы­хьэ драмтеатрхэм, КъБР-м и Музыкэ теат­рым.
Урыс драмэ театрым фестивалым хыхьэу игъэлъэгъуащ «И жизнь, и слёзы, и любовь» спектаклыр. Пушкин Александр и повестхэм къытращIыкIа мы лэжьыгъэр зыгъэувар ­режиссёр Толстовэ Евгениещ. Къэбэрдей драмэ театрым и артистхэм ягъэлъэгъуащ Чехов Антон и «Вишнёвый сад» спектаклыр. 
Ингушым и Урыс къэрал музыкэ-драмэ ­театрым Къэбэрдей къэрал драмэ театрым щигъэлъэгъуащ Цагарели А. и «Ханума» спек­таклыр. Шэшэн къэрал академическэ драмтеатр Нурадилов Ханпаши и цIэр зе­зыхьэм КъБР-м и Музыкэ театрым щигъэ­лъэгъуащ Лорка Ф. и «Кровавая свадьба» пьесэм къытращIыкIа спектаклыр.
Осетие Ипщэ къэрал драмэ театр Хета­гуров Коста и цIэр зезыхьэм Музыкэ къэрал театрым щигъэлъэгъуащ Розов Виктор и «Вечно живые» пьесэмкIэ ягъэува спектак­лыр. 
Осетие Ищхъэрэ - Аланием и къэрал академическэ театр Тхапсаев Владимир и цIэр зезыхьэм Музыкэ къэрал театрым щигъэ­лъэгъуащ Мольер Жан-Батист и «Мизан­­троп» пьесэмкIэ ягъэува спектаклыр. Балъкъэр драмэ театрым щекIуэкIащ Горький Максим и «Мещане» пьесэм къытращIыкIа спектаклыр.
Къэбэрдей драмэ театрым щекIуэкIащ актёр IэзагъэмкIэ мастер-класс. Адыгэ Республикэм и Лъэпкъ театрым, Цей Ибрэхьим и цIэр зезыхьэм, Музыкэ къэрал театрым щигъэлъэгъуащ Шинкубэ Бэгърат и романым къытращIыкIа «ЩIы IэмыщIэ» спектаклыр. Къэрэшей-Шэрджэсым драмэмрэ комедиемкIэ и Урыс театрым Къэбэрдей драмэ ­театрым щитащ Гоцци К. и «Женщина-змея» спектаклыр. Дагъыстэн къэрал музыкэ-драмэ театр Капиев Э. и цIэр зезыхьэм Музыкэ къэрал театрым щигъэлъэгъуащ Айтматов Чингиз и повестым къытращIыкIа «Мате­ринское поле» лэжьыгъэр. 
Абхъаз къэрал драмэ театр Чанбэ Самсон и цIэр зезыхьэм Къэбэрдей драмэ театрым щигъэлъэгъуащ Гогуа А. и романым къытращIыкIа «Большой снег» спектаклыр. КъБР-м и Музыкэ къэрал драмэ театрым езыхэм щагъэлъэгъуащ Соловьев-Седой В., Самойлов М. я «Небесный тихоход» спектаклыр. 
ЩоджэнцIыкIу Алий и цIэр зезыхьэ Къэ­бэрдей къэрал драмэ театрым щекIуэкIащ «Лъэпкъ драмэ театрхэм иджырей зэманым я зыужьыкIэр» зэIущIэр. Зэхыхьэм къы­щы­псэлъащ лъэпкъ драмтеатрхэм я уна­фэщI­хэр, режиссерхэр, художественнэ унафэщI­хэр, драматургхэр. Абыхэм къыхагъэщащ Кавказ Ищхъэрэм и драмтеатрхэм я зыу­жьыныгъэхэмрэ зыIэрагъэхьа ехъулIэныгъэ­хэмрэ зыхуэдэр, лъэпкъ драмтеатрхэм я фес­тивалым анэдэлъхубзэр хъумэнымкIэ мыхьэнэшхуэ зэриIэр, театрхэр зэрыщIэ-ным, зэдэIэпыкъуным я IуэхукIэ мыпхуэдэ зэ­хы­хьэр куэдкIэ къазэрыхуэщхьэпэр. Ап­хуэ­дэу гъуазджэм и лэжьакIуэхэм къыхагъэщащ драмэ театрхэр нобэ зыгъэгузавэ Iуэху зэIу­мыбзхэр, лъэпкъ драматургием зезы­гъэу­жьыфынухэр, артистхэр зэрымащIэр, мылъку­ри зэребзыхьэкIар. Ахэр зэчэнджэщащ ­гугъуехьхэр къызэнэкIыным ехьэлIауэ щIыналъэхэм щыIэ Iэмалхэм ятеухуауэ. 
Спектаклхэр ИнтернетымкIи къатащ. ­Къи­щы­нэмыщIауэ, гупыж зыщIхэм Iэмал яIэщ ютубканалым и онлайн-форматымрэ ­КъБР-м ЩэнхабзэмкIэ и министерствэм и сайтымкIэ видеохэм еплъыжыну. 
ТЕКIУЖЬ  Заретэ.
Сурэтхэр  Къарей Элинэ  трихащ.