Къабарты-Малкъарда бу кюнледе «Ломоносовский обоз. Сила в смысле» деген ат бла бардырылгъан федерал жарыкъландырыу проект кесини ишин бошагъанды. Лекторла  республиканы шахарларында, эллеринде, район араларында школлада, лицейледе, колледжледе болуп,  ачыкъ ушакъла бардыргъандыла.

 Проектни ахыргъы   тюбешиуюнде уа анга къатышхан, тюрлю-тюрлю регионларындан келген къонакъла бир бирге  сынауларындан юлюш этгендиле эмда эшитген, билген затларыны хайырлылыгъыны юсюнден чертгендиле. Республиканы къонакъларына проектни башчысы  Владимир Скрипниченко эмда  КъМР-ни  миллетлени ишлери эм жамауат  проектле жаны бла  министр Анзор Курашинов тюбегендиле.

Министр  проектге къатышханланы аллында сёлеше, аны жаш тёлюню арасында ниет, дин жаны бла да магъанасы къаллай уллу болгъанын черте, былай дегенди: «Бизге жарыкъландырыуну быллай  уллу эмда магъаналы проектин мында бардырыу уллу насыпды. Ол бизни жамауатны мурдоруну  хазнасын бютюн кючлендиреди. Бюгюнлюкде, дуния терк тюрленнген, кёп тюрлю технологияла эмда бола тургъан ишле жаш тёлюню акъылын кесине бийлей баргъан заманда, ёмюрле бла къурала келген  культурабызны эмда  миллетлерибизни энчилигин бютюнда бек  сакъларгъа керекбиз. Бизни жаш тёлюбюз акъыллыды, этимлиди, кючлюдю, аны себепли дагъыда бир кере къайтарып айтыргъа сюеме, ол башда айтылгъан хазнабызны сакъларгъа эмда керелерге борчлубуз. Мен ийнанама,  проектге къатышханыгъыз а сизни жашауугъузда Росейни чынтты  инсанлары болуугъа ахшы себеплик этерикди»,-дегенди министр.

Проектге къатышханла Владимир Скрипниченкогъа эмда Анзор Курашиновха Къабарты-Малкъаргъа келип, мында болгъан затланы кёргенлери эмда  программагъа къатышханлары бла байламлы оюмларын айтхандыла. Ала экспертле бла ачыкъ сёлешиулени кезиуюнде кётюрюлген вопросланы, регионну культурасы, адет-тёрелери бла шагъырейленнгенлерини магъанасы къаллай уллу болгъаныны юсюнден энчи чертип белгилегендиле.

Проектни башчысы Владимир Скрипниченко уа былай айтханды: «Хар регионда да биз школлагъа эмда колледжлеге барабыз, алада лекторла  жаш адамла къыйналмай ангыларча, тюрлю-тюрлю жаны бла  ушакъла бардырадыла, алада бек башы уа къыраллыкъны ангылау эмда аны магъанасын билиудю. Быллай тюрлю тюбешиуле, биз оюм этгенден,  жаш адамлагъа бек хайырлыдыла, биз а жер жерледе болумну юсюнден бютюн аслам билирча этебиз эмда  быллай  тюбешиуле мындан ары  ёсюп келген тёлюню патриот ниетледе юйретиу жаны бла  уллу  да, хайырлы да себепликдиле»,-дегенди проектни автору.

«Ломоносовский обозну» лекцияларында экспертле  школчулагъа юйюрню магъаналылыгъыны юсюнден, къаллай да болсун,  миллетлени араларында шуёхлукъ халланы къурауну, дунияда бола тургъан ишле адамны акъылында, къылыгъында къаллай ызла къойгъаныны, экстремизмге, терроризмге къажау къалай сюелирге кереклисини, спортну юсю бла жашауну  игилендирирге боллугъуну, битеу ол ишледе  асламлы информация органланы борчлары къалай уллу болгъаныны юсюнден  да айтхандыла.

Андан ары «Ломоносовский обоз» Север Кавказны регионларына атланнганды. Ала  Север Осетия-Аланиягъа, Ингушетиягъа, Чечен  эмда Дагъыстан республикалагъа  барлыкъдыла.

Проектни  жашауда «АНО ЗВЕЗДА»  бардырады, алагъа себепликни Россейли ФАНД эмда Россейни халкъларыны юйю РФ-ни Жарыкъландырыу министерствосу этедиле.

Холаланы Марзият.