Нальчикде Къабарты-Малкъар Республиканы Башчысы Казбек Коковну бла Къарачай-Черкес Республиканы Таматасы Темрезланы Рашидни эки жанлы тюбешиулери болгъанды. 
Эки республиканы да оноучулары регионланы араларында бирге ишлеуню андан ары бардырыуну онгларын сюзгендиле. Сёз асламысында билим бериуде, маданиятда, жаш тёлю политикада байламлыкъланы кючлеуню, жаш тёлюню патриот ниетде юйретиу жаны бла проектлени бирге бардырыуну юсюнден баргъанды. Эл мюлк, туризм, къурулуш жаны бла эмда башха бёлюмледе бирге ишлеуню онгларына энчи эс бурулгъанды.
Андан сора да, энчи аскер операциягъа къатышханлагъа, ол къазауатны ветеранларына эмда аланы юйюрлерине болушлукъну къурау, ол санда кадрла хазырлау бла байламлы федерал эмда регион программалагъа кёре себеплик этиу жаны бла сынаула туура этилгендиле. 
Казбек Коков Темрезланы Рашидге Къабарты-Малкъар Республиканы жокълагъаны ючюн жюрек ыразылыгъын билдиргенди. Республикаланы  ёмюрлени теренинден келген адет-тёреле, маданият  эмда дин хазнала байлашдыргъанларын чертгенди. «Арада байламлыкъланы андан ары айнытыу  къыралны кючлендириуге, Президентибиз Владимир Путин салгъан борчланы толтуруугъа да себеплик этериклерине ишексизме»,- дегенди, деп билдиргендиле КъМР-ни Башчысыны бла Правительствосуну пресс-службасындан.