Къабарты-Малкъар Республиканы Башчысы Казбек Коков эмда Шимал Осетия–Аланияны Таматасы Сергей Меняйло Озрекде жашагъанланы элге 100 жыл толгъаны бла алгъышлагъандыла.
Бу байрамгъа жоралап эллиле Маданият юйде Къабарты-Малкъар Республиканы биринчи Президенти Валерий Мухамедович Коков атлы Миллетле аралы культура араны ачылыууну къууанчын да этгендиле. Ала, элни къонакълары да Маданият юйде айтхылыкъ политикни бла къырал къуллукъчуну намысына къуралгъан сурат кёрмючде да болгъандыла.
Казбек Коков жангы Маданият ара магъаналы ишле бардырыллыкъ жерге айланырыгъына, Къабарты-Малкъарны бла Шимал Осетия-Аланияны халкъларыны араларында эрттеден келген къарындаш эмда шуёх байламлыкъланы, огъурлу къоншулукъну тёрелерин кючлендирирге себеплик этеригине толу ийнаннганын билдиргенди.
- Озрекде жашагъанлагъа иш кёллюлюклери, туугъан эллерин, Лескен районну, саулай республиканы да айныуларына уллу юлюш къошханлары ючюн жюрек ыразылыгъымы билдиреме. Ала Къабарты-Малкъарны махтаулу тарыхында кеслерини атларын айтдыргъандыла. Аладан белгили къырал къуллукъчула, эл мюлкде жигер урунуулары бла атларын айтдыргъанла, фахмулу алимле да чыкъгъандыла.
Озрек эл мындан ары да кёп жылланы жашнай барсын, анда жашагъанла уа узакъ ёмюрлю, кийик саулукълу болсунла, жангы хорламлагъа жетсинле! - дегенди кесини алгъыш сёзюнде Къабарты-Малкъарны Башчысы.
Сергей Меняйло да бу байрамны Озрекде жашагъанла бла бирге белгилегенине къууаннганын билдиргенди. «Къарындаш республиканы жеринде бизни жерлешлерибиз да жашайдыла. Ала ата-бабаларыны адет-тёрелерин бек къаты сакълайдыла. Ма бу гитче дюгер элчик къыралгъа белгили политиклени, алимлени, маданиятда бла спортда айтхылыкъ жашланы бла къызланы бергенди», - деп чертгенди ол алгъышлау сёзюнде.
Ол къууанчлы кюн Озрекде жашагъанланы эмда аны къонакъларыны алларында Къабарты-Малкъарны бла Шимал Осетия-Аланияны белгили той-оюн къауумлары бла жырчылары тепсеп, жырлап да зауукълукъ тапдыргъандыла.
Ол кюн окъуна Казбек Коков бла Сергей Меняйло Озрекде М.Х.Кебеков атлы школну жокълап, ол къалай жангыртылгъанына къарагъандыла.
Аны мекямы 70-чи жыллада ишленнгенди эмда андан бери анга тынгылы ремонт этилмегенди. Федерал программаны хайырындан бу окъуу юй толусунлай жангыртылгъанды. Энди ол шёндюгю излемлеге толусунлай келишеди. Классларында керекли оргтехника эмда компьютерле бардыла, тийишли мебель да салыннганды. Ашханасы да шёндюгю оборудование эмда мебель бла жалчытылыннганды.
Къысхасы, мында сабийле тынч-ырахат окъурча онгла къуралгъандыла. Республикаланы башчылары школну коллективине, устазлагъа бла окъуучулагъа жетишимле тежегендиле, туугъан республикаларына бла къыралларына жарарча инсанла болуп ёсерлерин сюйгенлерин айтхандыла, деп билдиргендиле КъМР-ни Башчысыны бла Правительствосуну пресс-службасындан.
Юсюпланы Галина
хазырлагъанды.
