Бу кюнледе Терк сууну юсюнде ишленнген узунлугъу 162 метр болгъан Джулат кёпюрню ачылыуу болгъанды. Ол Шимал Осетия-Алания Республика бла чекде «Майский-Урожайный» автомобиль жолну юсюндеди. Бу къурулуш арт кезиуде эм уллуладан бирине санала эди, деп жазгъанды республиканы оноучусу Казбек Коков кесини телеграм-каналында.
Уллу эмда кёп къыйын салыннган проект чегине жетдирилгенди, башхача айтханда, кёпюр жангыдан ишленнгенди дерге боллукъду, ол узун эм кенг да болгъанды. Кёпюрню юсюнде бир жанына эки, бирси жанына да эки автомашина жюрюрча онг болгъанды. Жолчула кёпюрню бютюн тутхучлу этгендиле, жерге 54 энчи багъаналаны ургъандыла, суу жагъаларында да тийишли ишлени бардыргъандыла, кёпюрню битеу бетондан этилген затларын алышхандыла. Терк сууну экология болумун игилендирирча сууну тазалагъан система да орнатхандыла. Кёпюрню битеу узунлугъуна чыракъла жанарча этгендиле, эки жанында тротуарла да ишленнгендиле.
Ишле тюзюнлей суу баргъан жерде тамамланнгандыла, аны ючюн алгъадан дамба ишлеп, сууну келгенин бир кесек башха жанына бургъан эдиле. Автомобильлени жюрюгенлерин болжал халда ишленнген 80 метр узунлугъу болгъан кёпюр бла жиберип тургъандыла.
Кёпюрню ишлерге билимлерин, кючлерин да аямай, бийик качестволу ишни тамамлагъанлары ючюн бу къурулушда уруннган жолчулагъа жюрек ыразылыгъымы билдиргенме, аланы бир къауумуна къырал эм багъалы саугъала да бергенме, деп айтылады республиканы оноучусуну билдириуюнде.
