Къэбэрдей-Балъкъэрым гъэсыныпхъэ­хэмкIэ, энергетикэмкIэ и IуэхущIапIэхэр бжьыхьэ-щIымахуэ пIалъэм зэрыхуэ­хьэ­зырым щытепсэлъыхьащ КъБР-м и Парламентым. 

УхуэныгъэмкIэ, псэупIэ-коммунальнэ ­IэнатIэмрэ гъэсыныпхъэ-энергетикэ IуэхухэмкIэ комитетым къызэригъэпэща зэIущIэм ­хэтащ КъБР-м и Iэтащхьэмрэ Правитель­ствэмрэ я лIыкIуэу КъБР-м и Парламентымрэ суд IуэхущIапIэхэмрэ щыIэ ДыщэкI Мадинэ, депутатхэр, республикэм и министерствэхэм, къалэ округхэм я щIыпIэ администрацэхэм я лэжьакIуэхэр.
Комитетым и унафэщI Къумал Заурбэч зэIущIэр къыщызэIуихым жиIащ ТЭК-м и IуэхущIапIэхэр бжьыхьэ-щIымахуэ пIалъэм фIыуэ зэрылажьэм елъытауэ зэрыщытынур цIы­хухэм я тыншыгъуэмрэ щIыналъэм и соци­ально-экономикэ щытыкIэмрэ. 
- Мы зэманым щIымахуэ гъэплъыгъуэм щIэгъэхуэбжьауэ зыхуагъэхьэзыр: Iэмэп­сымэхэр къапщытэ, тIорысэ хъуахэр зэра­хъуэкI, гъэсыныпхъэхэр ягъэтIылъ. А псор иджыпсту зыхуей хуэгъэзапхъэщ, щIыIэр къэсмэ, IуэхущIапIэхэм къатемыхьэлъэн папщIэ, - жиIащ Къумалым.
Депутатым къыхигъэщащ а Iуэхур къэрал IуэхущIапIэхэми щIыпIэ унафэр зезыхьэ ­къулыкъущIэхэми зэпымыууэ я нэIэм зэры­щIэтыр, щIыналъэ комиссэ зэрыщыIэр. 
- Гъэсыныпхъэ-энергетикэ комплексым и IуэхущIапIэхэр егъэфIэкIуэнымрэ Iэмэпсымэ и лъэныкъуэкIэ ахэр къэгъэщIэрэщIэжыным-рэ мы зэманым гулъытэ хэха хуащI. КъБР-м и Iэтащхьэ КIуэкIуэ Казбек и пщэрылъкIэ, ­КъБР-м и Правительствэмрэ жылагъуэр ­хуабэкIэ къызэзыгъэпэщ IэнатIэхэмрэ лэжьыгъэшхуэ зэфIагъэкIащ, гъэплъыгъуэр тэмэму екIуэкIын папщIэ. Ди комитетым чэнджэщ щхьэхуэхэр игъэхьэзыращ хуабэр зыутIыпщ Iуэ­хущIапIэхэр егъэфIэкIуэным епхауэ, - дыщIигъуащ къэпсэлъам.
ЗэIущIэм къыщыпсэлъащ КъБР-м ухуэныгъэмрэ псэупIэ-коммунальнэ IуэхущIапIэхэмкIэ и министрым и чэнджэщэгъу нэхъыщхьэ Бэлагъы Борис, Налшык къалэм и щIыпIэ ­администрацэм и Iэтащхьэм и япэ къуэдзэ Тонконог Анатолий, Прохладнэ къалэм и щIыпIэ администрацэм и Iэтащхьэ Кожухов Кирилл, Бахъсэн къалэм и щIыпIэ администрацэм и Iэтащхьэм и къуэдзэм и къалэнхэр зыгъэзащIэ Къардэн Мартин, ЭкологиемкIэ, технологиемрэ атомнэ кIэлъыплъыныгъэмкIэ федеральнэ IэнатIэм энергетикэмрэ гидротехникэ ухуэныгъэхэмрэ кIэлъыплъынымкIэ  и къудамэу КъБР-м щыIэм и унафэщI Пеганов Сергей сымэ.
Бэлагъы Борис зэрыжиIамкIэ, гъэплъы­гъуэм хуагъэхьэзыращ фэтэр куэду зэхэт унэ 2900-м щIигъу. Жьы дыдэ хъуа псы кIуапIэхэр Налшык къалэм щызэхъуэкIыным лэжьы-гъэр къызэрызэтригъэувыIари ягъэзэкIуэжащ. Къэпсэлъам къызэрыхигъэщамкIэ, унэхэм хуабэр щратыр махуитхум и кIуэцIкIэ ику иту градуси 8-м ищIагъ щыщыIэрщ. Сымаджэщхэм, поликлиникэхэм, сабий гъэсапIэхэм, жьы хъуахэм я унэм - ягъэбелджыла пIалъэм тету хуабэр хуаутIыпщащ. 
Коммунальнэ Iуэхутхьэбзэхэр цIыхухэм тэ­мэму хузэфIахын папщIэ, къалэ округхэмрэ районхэмрэ я щIыпIэ администрацэхэм къы­зэрагъэпэща аварийно-диспетчер IэнатIэхэр махуэми жэщми лэжьэнущ. А Iуэхухэм зэпы­мыууэ кIэлъоплъ КъБР-м Ухуэныгъэмрэ псэу­пIэ-коммунальнэ IуэхущIапIэхэмкIэ и министерствэр. 
Тонконог Анатолий къыхигъэщащ Налшык къалэм фэтэр куэду зэхэт и унэ 1355-рэ я нэIэм зэрыщIэтыр. Абы щыщу 1095-м я Iуэ­хутхьэбзэхэр къызэрагъэпэщ управляющэ компаниехэм, 100-м нэблагъэм ТСЖ, ТСН, ЖСК яIэщ, 162-р абыхэм щыпсэухэм я унафэм щIэтыжщ. 
Кожухов Кирилл зэрыжиIамкIэ, Прохладнэ къалэм хуабэр езыт IуэхущIапIэу щы щолажьэ, управляющэ компаниеу 7-м я нэIэм щIэтщ фэтэр куэду зэхэт унэ 200-м щIигъу. IуэхущIапIэхэм бжьыхьэ-щIымахуэ пIалъэм зыхуагъэхьэзыру ирагъэкIуэкIа лэжьыгъэм псоми зэхэту текIуэдащ сом мелуан 12-м нэблагъэ. ХуабэкIэ къызэрызэрагъэпэщ бжьамий километри 3,5-рэ къащэхуащ, жьы хъуауэ метр 500-м ар щызэрахъуэ­кIащ. 
Къардэн Мартин жиIащ Бахъсэн къалэм фэтэр куэду зэхэт уни 143-рэ зэриIэр. 2025 гъэм лэжьыгъэ зэмылIэужьыгъуэхэм, унащхьэ зэхъуэкIынри яхэту, трагъэкIуэдащ сом мелуан 1,5-рэ. Жэпуэгъуэм и 1-м ирихьэлIэу ахэр псори гъэплъыгъуэм хьэзыр хуащIащ. Къардэныр тепсэлъыхьащ Бахъсэн дэт прогимназие №2-м и котельнэм щIэт Iэмэп­сымэхэр зэрызэрахъуэкIми. А Iуэхухэм щIыпIэ бюджетым къыхухагъэкIащ сом мелуани 3. 
Пеганов Сергей къыщыпсалъэм къытеувыIащ республикэм хуабэкIэ къызэзыгъэпэщ и IуэхущIапIэхэмрэ электроэнергетикэм и лэ­жьыгъэмрэ епхауэ щыIэ ныкъусаныгъэхэм.
ЗэIущIэм щыжаIахэр къэлъытауэ, КъБР-м и Парламентым и комитетым унафэ къищтащ. Къумал Заурбэч жиIащ абы къызэрыщагъэлъэгъуар республикэм и унэхэмрэ соци­альнэ мыхьэнэ зиIэ IуэхущIапIэхэмрэ щагъэплъ пIалъэм, мардэхэм, Iэмал иIэххэмэ, зэхъуэкIыныгъэ хэлъхьапхъэу. Псалъэм папщIэ, мы зэманым унэхэм хуабэр щратыр махуитхум и кIуэцIкIэ ику иту градуси 8-м нэмыс щIыIагъ иIыгъмэщ, ар градус 12-м ­хуа-гъэ­кIуэныр, махуищым теубыдэныр нэхъ яфIэкъабылщ.