Мы махуэхэм Налшык Кавказ Ищхъэрэмрэ Урысей Ипщэмрэ я театр гъэлъэгъуапIэ нэхъыщхьэ хъуащ. КъБР-м и Музыкэ театрым жэпуэгъуэм и 13-м къыщызэIуахащ лъэпкъ драмэ театрхэм я «Южная сцена» фестивалыр. Ар къызэрагъэпэщ УФ-мрэ КъБР-мрэ ЩэнхабзэмкIэ я министерствэхэм, УФ-м и Театр лэжьакIуэхэм я зэгухьэныгъэмрэ абы и щIыналъэ къудамэмрэ.
- Фи махуэ фIыуэ, ди хьэщIэ лъапIэхэ, лъэпкъыбэ фестивалым хэтыну, абы еплъыну къэкIуа псоми! Къэбэрдей-Балъкъэрым и театр лэжьакIуэхэм къабгъэдэкIыу нывжызоIэ ижь-ижьыж лъандэрэ хьэщIэ зыфIэфI ди щIыналъэм Iуэху дахэкIэ фыкъызэрытхуеблэгъар дызэригуапэр. «Южная сцена» фес- тивалыр ди щIыналъэм зэрыщекIуэкIыр дэркIэ гуфIэгъуэщ. Ди республикэм и щэнхабзэ гъащIэмкIэ ар мыхьэнэшхуэ зиIэ Iуэхущ, иджырей драмэ театрым и зыужьыныгъэм зыхагъэгъуэзэнымкIи ар IэмалыфIщ. Шэч къытесхьэркъым лъэпкъ театрхэм я лэжьыгъэ нэхъыфIхэр удихьэхыу зэрагъэлъэгъуэнум, ди щIыналъэм исхэу театр гъуазджэм дихьэххэм ахэр ягу зэрыдыхьэнум, я нэгу зэрызрагъэужьынум, - жиIащ КъБР-м и Театр лэжьакIуэхэм я зэгухьэныгъэм и унафэщI Фырэ Майе.
Ар къеджащ УФ-м и цIыхубэ артист Машков Владимир фестивалым хэтхэм къахуигъэхьа хъуэхъум. Абы итщ:
- «Южная сцена» фестивалым хэтхэм, абы и хьэ-щIэхэм, ар къызэзыгъэпэщахэм, театреплъхэм фIэхъус гуапэ фызох! Фестивалыр щекIуэкIыну махуэхэм Налшык щызэхуэсынущ Урысейм и щIыналъэхэм я лъэпкъ театрхэр, Абхъазым, Осетие Ипщэм я театрхэр. Быдэу си фIэщ мэхъу артист Iэзэхэм я зэфIэкIыр абдеж зэрыщагъэлъэгъуэнур, театр лэжьакIуэхэм я Iэзагъым хагъэхъуэнымкIэ ахэр щхьэпэ зэрыхъунур, театр гъуазджэм и зыужьыныгъэм хэлъхьэныгъэ зэрыхуащIынур. Артистхэм гукъыдэж фиIэу зыкъэвгъэлъэгъуэну, театреплъхэм лэжьыгъэхэр гукъинэж фщыхъуну!
Фестивалым и къэпщытакIуэ гупым и унафэщI, филологие щIэныгъэхэмкIэ доктор, профессор, УФ-м и школ нэхъыщхьэм щIыхь зиIэ и лэжьакIуэ, Театр гъуазджэмкIэ Урысей институтым тхыдэмкIэ, философиемрэ литературэмкIэ и кафедрэм (ГИТИС) и унафэщI Ястребов Андрей зэхыхьэм хэтхэм фIэхъус гуа-пэкIэ захуигъэзащ икIи къыхигъэщащ гуапагъэмрэ захуагъэмрэ зи лъабжьэ фестивалым и фIыгъэкIэ театр гъуазджэм и хабзэ дахэхэр дяпэкIи яхъумэну, зрагъэужьыну зэрыщыгугъыр.
ЩоджэнцIыкIу Алий, Кулиев Къайсын я цIэхэр зезыхьэ драмтеатрхэм, Налшык и къэрал киноконцерт гъэлъэгъуапIэм жэпуэгъуэм и 13-м щыщIэдзауэ и 18 пщIондэ щокIуэкI Кавказ Ищхъэрэм и лъэпкъ театрхэм я спектакль нэхъыфIхэр. Жэпуэгъуэм и 13-м фестивалыр къызэIуахащ Горький Максим и цIэр зезыхьэ Урыс къэрал драмэ театрым игъэлъэгъуа «И жизнь, и слёзы, и любовь» спектаклымкIэ. Пушкин Александр и повестхэм къытращIыкIа мы лэжьыгъэр зыгъэувар режиссёр Толстовэ Евгениещ. Щэбэт пщIондэ хьэщIэхэмрэ республикэм исхэмрэ зыхагъэгъуэзэну Iэмал яIэщ Абхъазым, Дагъыстэным, Шэ-шэным, Ингушым, Къэбэрдей-Балъкъэрым, Адыгейм, Къэрэшей-Шэрджэсым, Осетие Ищхъэрэ-Аланием, Осетие Ипщэм я театр нэхъыщхьэхэм я зэфIэкIхэм. Музыкэ театрым и пэIущIэ пэшым щагъэлъагъуэ республикэм и театр гъуазджэм и тхыдэр къыщыгъэлъэгъуэжа, артистхэм я сурэтхэу яхъумэхэм ящыщ.
ТЕКIУЖЬ Заретэ.
Сурэтхэр Къарей Элинэ трихащ.
