Къэбэрдей-Балъкъэрым СпортымкIэ и министерствэм иджыблагъэ зэIущIэ гуапэ щекIуэкIащ. Республикэм спортым тетхыхь и журналистхэр абы щыхуэзащ ММА-мкIэ дуней псом пашэныгъэр къыщыхьыным хуэунэтIауэ Санкт-Петербург къалэм щызэхэта зэхьэзэхуэм дыжьын медаль къыщызыхьа Мансуров Имран. Абы щытепсэлъыхьащ зэIущIэхэр зэрекIуэкIам, спортсменым зыхуигъэувыж къалэнхэм, республикэм спортым зыщегъэужьынымкIэ щыIэ Iэмалхэмрэ зэлэжьыпхъэхэмрэ.

КъБР-м спортымкIэ и министрым и къуэдзэ Хэжь Заур спортсмен ныбжьыщIэм фIыщIэ хуищIащ республикэм и щIыхьыр иIэту ехъулIэныгъэфIхэр къызэригъэлъэгъуам папщIэ: «Нобэрей ехъулIэныгъэр и щыхьэтщ Къэбэрдей-Балъкъэрым и спортсменхэм зэфIэкIыфIхэр зэраIэм, зэIущIэшхуэхэм ахэр зэрыхуэхьэзырым икIи зэзауэ зыхэт спорт лIэужьыгъуэхэм щIыналъэм зыщаужьынымкIэ шэсыпIэфI ар зэрыхуэхъур. Иджырей  Iэмэпсымэхэмрэ оборудованэхэмкIэ, нэгъуэщI зыхуей-зыхуэфIхэмкIэ спортсменхэр къызэгъэпэщыным, абыхэм я зэфIэкIым хэгъэхъуэным ехьэлIа лэжьыгъэ пыухыкIахэр идогъэкIуэкI: спортзалхэр зыдогъэпэщыж е доухуэ, къэрал пэхуэщIэхэм дыхэтщ», - жиIащ Хэжьым.

 Мансуров Имран тепсэлъыхьыжащ зэхьэзэхуэхэр зэрекIуэкIам.

«Япэ зэIущIэм хухаха зэманыр и кIэм нэмысу ар къыфIэсхьащ Белоруссием и спортсмен Егор Кундас. ЕтIуанэм къыщыспэщIэхуащ дуней псом и чемпион нэгъабэ хъуа, УФ-м и зэуакIуэ Степан Цицорин. Ауэ, дауэ гугъу сыдемыхьами, текIуэныгъэр зыIэрызгъэхьащ. Финалым и Iыхьэ ныкъуэм сыщыIущIащ Тэтэрстаным и бэнакIуэ лъэщ Нефтахов Алмаз. Раундищри дезгъэкIуэкIын хуей хъуащ абы, ауэ ари хэзгъащIэри, финалым сыкIуащ.

КIэух зэхьэзэхуэм сыщыхуэзащ Пархоменкэ Артем. ЗэIущIэм сыхуэхьэзыру си гугъэу утыкум сихьа щхьэкIэ, сщIэркъым, къару схуримыкъужауэ къысщохъу иужьым. Япэ махуэр хьэлъэу екIуэкIати, етIуанэ махуэм си Iэпкълъэпкъыр схузэщIэIулIэжакъым», - жиIащ Мансуровым.

Имран и тренер Хьэщыкъуей Артур къыхигъэщащ абы и гъэсэныр тIэкIу зэрыщхьэприхар, финалым къыщыпэщIэхуа спортсменым ипэкIэ текIуауэ зэрыщытам игъэбэлэрыгъауэ къызэрилъытэр. Апхуэдэу щыхъукIи, Мансуровыр и хьэлъагъ елъытауэ щызэуа гупым езым нэхърэ нэхъыщIэ яхэтакъым.   «Илъэс ипэкIэ жытIауэ щытащ къыкIэлъыкIуэ дунейпсо зэхьэзэхуэм ехъулIэныгъэфIхэр щызыIэрыдгъэхьэнуи, ди псалъэм депцIыжакъым. Ауэ иджыпсту нэхъыщхьэр – къэмыувыIауэ адэкIэ кIуэтэнырщ. Лэжьэн хуейщ, ерыщу, гупсысэ хэлъу», - щыжиIащ зэIущIэм КъБР-м Зэзауэ зыхэт спорт лIэужьыгъуэхэмкIэ и федерацэм и тхьэмадэ ПщыукI Залым.

Фигу къэдгъэкIыжынщи, Санкт-Петербург къалэм щекIуэкIа дунейпсо зэхьэзэхуэм хэтащ къэрал куэдым я спортсмен 200-м нэблагъэ, я ныбжькIэ илъэс 16 - 17-хэм щIимыгъуауэ. Мансуров Имран абы щызэуащ килограмм 70,3-рэ зи хьэлъагъхэм я деж. 

КЪУЭЖЕЙ Алим.