Бу кюнледе Нальчикни  Александровка  тийресиндеги биринчи номерли школ -интернатда сейирлик иш болгъанды. Анда  капитал ремонт этилгенден сора,  бир корпусну ачхандыла. Ол иш интернатда тургъан къызчыкълагъа бла жашчыкълагъа, устазлагъа, юйретиучюлеге да бек аламатды.

Жангы корпусну ачыу бла бирге ол кюн  интернат-школда адыгланы, аланы  миллет кийимлерини кюнюн да къууанчлы халда  белгилегендиле. Битеу ол ишле  эсде къалырча болгъандыла, аны бла бирге уа  шёндюгю билим бериуню бла  миллет тёрелени сакълауну аламат юлгюсю болгъанды.

Окъуу юйге капитал ремонт этиу а  аны танымазча тюрлендиргенди. Жангы жарыкъ классла, ичлеринде шёндюгю заманны излемине тийишли, битеу керекли амалла, эркин коридорла, тап жарашдырылгъан окъуу кабинетле, сабийле солурча  ариу жерле.  Ремонт ишле  мекямланы ичинде этилип къалмай,  аны тёгерегинде жерлеге да тап халгъа келтирилгендиле. Санларында къыяулары болгъан сабийлеге деп  энчи жерле жарашдырылгъандыла. Битеу ол затла  окъуу процесс тынгылы бардырылырча онгла къурайды.

Школ –интернатны  жангыртылгъан  корпусун ачыуну къууанчына  кёп къонакъла келгендиле, ол а бу ишни билим бериуде магъаналылыгъын  бютюн чертгенди. Аланы  араларында  КъМР-ни билим бериу эмда илму  министри  Анзор Езаов, КъМР-ни Парламентини Председателини орунбасары Жанатайланы Салим, коррекциялы билим бериу бёлюмню начальниги ….Хучиналаны Мадина, Нальчикде «Сабийлени эм жаш тёлюню  чыгъармачылыкъларыны къаласыны» директору Аксана Карашева, республикада болгъан  интернат-школланы директорлары, КъМР-ни Жарыкъландырыу эмда илму министерствосуну  келечилери да бар эдиле.

Аланы хар бири да,  къалай-алай болса да,  биринчи номерли интернатны  тапландырыугъа  кеслерини юлюшлерин къошхандыла. Директорла уа бир бирлерине дайым да сынауларындан юлюш этедиле.

Сёзсюз, бу къууанчлы ишге бек  баш къонакъла – интернат-школда окъугъанла, аланы ата-аналары, устазлары да  келгендиле. Башда айтылгъан къуллукъчуланы барыны да хайырындан  тохтаусуз къайгъырыулукъларындан  жангыртылгъанды школ, деп таукел айтыргъа боллукъду. Нек дегенде,  ала бары да  ремонт ишле башланып, бошалгъынчы  бир кюннге да тынчаймагъандыла, къайгъыргъанлай тургъандыла.

Къонакъла, къууанчлы ишге къатышханла да  ремонт этилген школну ичинде айланып, хар затны да кёргендиле эмда бек кёп, уллу иш да тамамланнганын чертгендиле. Ала ремонт этилген  корпусха къарап чыкъгъанларындан сора,  интернат-школда окъугъан  сабийлеге, ишлеген  преподавательлеге да анда къаллай уллу эмда  магъаналы онгла, амалла да  ачыкъланнганларын  белгилегендиле.

Андан сора уа тюбешиуню къууанчлы кесеги да башланнганды. Аны  интернат-школну директору  Майя Понежева ачханды. Ол кесини сёзюнде ремонт ишле тамамланылгъынчы къаллай къыйын болумлада ишлегенлерини,  ремонт къалай  баргъанын, къурулушчула уа керти да битеу билимлерин, усталыкъларын салып ишлегенлерин, жетишимлерини,  мындан ары  интернат-школ къалай айнырыгъыны юсюнден да тынгылы хапар айтханды. «Биз, устазла, юйретиучюле да боюнубузгъа алгъан борчну  дурус ангылайбыз, аны себепли жетишимлеге жетер ючюн да, къолубуздан келгенни этерден артха турлукъ тюйюлбюз.  Мен ийнанама,  жангыртылгъан школ, мында окъугъан сабийлени кёп жаны бла не къадар  айнытыр ючюн  ишлерикди. Коллективни ишини баш борчлары, ала  сабийле окъуу программаны  не къадар тап халлада билирча этиудю, жангы  методикаланы хайырланыуду, сабийлени чыгъармачылыкъ жаны бла айнытыуду, тийишли медицина болушлукъ этиудю, окъуудан бош заманларын хайырлы ётдюрюрча онгла къурауду.

Бизни сабийлерибизге быллай аламат  школну ишлеп берилгени ючюн республиканы оноучуларына, Жарыкъландырыу эмда илму министерствогъа, битеу ремонт  ишлери тынгылы эмда заманындан алгъа  этип берген подряд организациягъа  эмда битеу урунуу коллективге жюрек ыразылыгъымы билдиреме»,-деп белгилегенди Майя Понежева.

Министр Анзор Езаов а школну ичинде байрамны жарыкъ бардырырча  бюгюн  бир ненча ахшы  шарт болгъанын белгилегенди. «Биз школгъа капитал ремонт этиу ишни аны бла тохтатып къоярыкъ тюйюлбюз, бюгюннге дери дагъыда эки корпусха ремонт  этилгенди. Мен кючюн, къарыуун, жюрек жылыуун да салгъан школ коллективни командасына  ыспас этеме. Биз, сабийлеге эмда педагоглагъа  деп ишленнген, шёндюгю заманны сурамына келишген, окъуу процессни не къадар тынгылы бардырыргъа боллукъ мекямны  туура кёребиз. Жангы мекямда  ишлеу, педагоглагъа билимлерин, усталыкъларын да  сабийлеге не къадар кёп берирча онгла бардыла. Энчи ыспасны къурулушчулагъа айтыргъа тийишлиди, ала бизни  муратыбызны жашаугъа  кийирир ючюн къолдан келген битеу ишлени  тынгылы тамамлагъандыла. Дагъыда бу жангыртылгъан школну  ачыуну къууанчына келген битеу къонакълагъа да жюрек ыразылыгъымы билдиреме»,-дегенди  Анзор Клишбиевич. 

КъМР-ни Парламентини Председателини орунбасары Жанатайланы Салим а, ол кюн ары келгенлеге айланып, концертге дери жангыртылгъан  хар жерге да тынгылы  къарап чыкъгъанын, сабийле, аланы ата-аналары, педагогла, юйретиучюле бла да сёлешгенин, хар бири да бек ыразы болгъанларын айтханды.

«Бек башы – ол коллектив эмда сабийледиле, битеу бу затла бары да алагъа деп этилгендиле. Бир ненча кюн мындан алгъа республикабыз эм жаш байрамладан бирин –Адыгланы кюнюн -белгилегенди. Биз, Парламентде  ишлегенле, республиканы бир ненча элине барып, алада байрам къалай  болгъанына къарагъанбыз, хар къайда да ариу адамла миллетлерине, тутхан динлерине да къарамай, бир бирлерин ачыкъ  жюрекден алгъышлай эдиле. Бизни барыбызны да кючюбюз  бирликдеди, аны себепли бюгюн республикабызны мындан ары да экономикасы,  культурасы, социал жаны  айнырын, жашнап барырын сюйгеними билдиреме»,-деп чертгенди Жанатайланы Салим.

Жыйылыула бардырылыучу  жангыртылгъан залны  сахнасындан  «Вдохновение» школ театргъа жюрюген жашла бла къызла  жырлагъандыла, тепсегендиле, назмула айтхандыла. Жаш артистле аны бла бирге  «Эринчек Шадула» деген жомакъгъа кёре сахна оюнну да кёргюзтгендиле. Ала артистликлерин  ачыкълау бла къалмай, къабарты, малкъар адет -тёрелени  билгенлерин да  туура этгендиле. Алай бла концерт программалары бла  келген къонакъланы, ата-аналарын да  къууандыргъандыла.

Мекямны биринчи этажында уа  миллет ашарыкъланы  кёрмючю къуралгъанды.

Холаланы Марзият.