Быйыл кюз артында  Къабарты-Малкъарны аграрчылары  1 минг гектар чакълы бирде терек бахчалыкъла  орнатыр муратлары барды. Эсге сала айтсакъ, жаз башында мюлкледе  терекчиклени 550 гектарда салыргъа жетишгендиле. Бирде терк айныгъан терекчикле жер жарашдырыр ючюн  эски битимлени  тамырлары бла кетерирге, жерни да игилендирирге  тюшеди. 

 Саулай алып айтханда, бюгюнлюкде республикада   терек бахчалыкъланы саны 26,4 минг гектаргъа жетеди.  Аны танг кесегинде неда 23 минг гектардан   артыгъында терк айныгъан тюрлюсю   ёседи.  Мюлкледе,  алма, кертме, эрик, шаптал эм башха жемиш терекледен сора да, наныкъны эм жилекни да аслам саладыла. Алай бла республика арт жыллада терек бахчалыкъларыны кёплюгю бла алчы регионланы тизмесине киреди.

Былтыр энчи предпринимательле бла биригиуле жемишледен бла наныкъладан 500 минг тонна   тирлик жыйгъандыла. Саулай алып айтханда уа, мюлклени барында да 785,9 минг тонна тирлик алыннганды.

Республика жемиш, тахта кёгет эм наныкъ продукция бла кесин жалчытхандан сора да, бирси регионлагъа да жиберип, импортну алышындырыу программаны толтурады. Келир заманда бахчаланы санына къошула барлыкъды, алай эсе уа, производство да ёсерикди. Терек бахчалыкъ бирси бёлюмлени  аш-азыкъ эм жарашдырыучу производстволаны айныууна да ахшы къошумчулукъ этеди. Сёз ючюн, пластикден орунла, бетон чыпынла, буздан сакълагъан аула эм кёп башха затла этиледиле. Ол санда питомниклеге да  къошула барады.

Эсге  сала айтсакъ, бюгюнлюкде республикада жемишле бла  юлкюледен жылгъа  2,8 миллион терек ёсдюрюледи. Болсада  Эл мюлк министерствода  2030 жылгъа  аланы санын  3 миллионнга жетдирирча мадар этиллигин  билдиргендиле.

Магометланы Сулейман.