Россейни аскерине къуллукъ этерге кюз арты чакъырыу башланнганды. Бу жол республикагъа 800 жашны ашырыргъа борч салыннганды. Къабарты-Малкъарны аскер комиссары Дмитрий Пахомов журналистле бла тюбешиуде билдиргенича, жашла Узакъ Востокну регионларындан, Петропавловск-Камчатск крайдан башлап Калининградха дери аскер бёлюмледе къуллукъ этерикдиле.
Дмитрий Юрьевич, тюбешиуню ача, хар замандача, кюз арты чакъырыу 1 октябрьден 31 декабрьге дери бардырылгъанын айтханды. Жашланы аскерге 15 октябрьде ашырып башларгъа белгиленеди: ала поезд, самолёт бла да барлыкъдыла. Аны аллында уа жашла аскер форма, башха керекле бла жалчытылынадыла.
КъМР-ни Башчысыны Указы бла аскерге чакъырыу жаны бла 14 комиссия къуралгъанды, бири республикалы, къалгъанлары районлада ишлейдиле. Военком Россейни аскерине чакъырыу, къуллукъ этиу, арт болжалгъа салыу жаны бла законлагъа тюрлениуле этилмегенлерин билдиргенди. Къуллукъ этиу, алгъынча, бир жыл барады.
– Жаланда бир жангычылыкъ барды – 1 октябрьден къыралда Аскер эсепге салыуну бирикдирилген тизмеси ишлеп башлагъанды. Энди аскерге чакъырыу бла байламлы жумушланы толтурургъа повестка электрон халда берилликди, – дегенди ол.
Военком ангылатханыча, аскерге чакъырылгъан инсаннга комиссиягъа келирге кереклисини юсюнден билдириу Госуслуги порталда басмаланады. Анда, ссылкагъа басханда, Бирикдирилген тизме ачылады. Повестка анда басмаланыпды: къайсы комиссиягъа эм къачан келирге кереклиси жазылып.
– Повестка Госуслуги порталда билдириу басмаланнган кезиуден жети кюнню ичинде алагъа жетдирилгенине саналады. Ол билдириуге къарагъанмыды, кёрмегенмиди, неда Интернет болмагъан жердеми жашайды, башхалыгъы жокъду – жети кюн бериледи аны бла шагъырей болургъа. Ызы бла 20 кюнню ичинде аскер комиссариатха келирге керекди. Алай бла, 27 кюнню ичинде инсан аскер комиссариатха келмесе, анга законлагъа тийишли мадарла толтуруладыла, – деп чертгенди ол.
Мадарланы юслеринден айтханда, алгъынча, Административ бузукълукъланы кодексине тийишлиликде тазир салыныргъа боллукъду. Жангы излемлеге кёре уа, аскерге чакъырыу низамны бир тюрлю законлу сылтау болмай толтурмагъан инсанны тыш къыралгъа барыргъа, машинаны жюрютюрге, мюлкюн къырал эсепге салыргъа, энчи предпринимательча эсепге турургъа эркинликлерине чекле салынадыла. Дагъыда аллай инсаннга банк кредит бермей къояргъа да боллукъду.
– Тизме битеу къыралда да бирди, ол Россейни башчысыны Указына кёре ишлейди. Анга битеу жууаплы ведомствола кеслерини шартларын кийиредиле. Сёзге, инсан паспортун алышса, ич ишле органла аны юсюнден военкоматха билдиреди. Битеу бу мадарла женгиллик этедиле, адамгъа ведомстволагъа жюрюр кереклиси болмай къалады, – деп ангылатханды бу жангычылыкъны военком.
Тюбешиуню ахырында Дмитрий Пахомов журналистлени сорууларына жууапла бергенди.
Тикаланы Фатима.
Сурат авторнуду.
