Яникой элни орта школунда Орус география биригиуню жарыкъландырыу проектине жораланнган жыйылыуладан бири бардырылгъанды. Бу жол ол «Жолоучулукъгъа атлан да, кёр: Бызынгы – Деменгиликге жол» деген ат бла ётгенди.

Илму-жарыкъландырыу жыйылыугъа окъуучула, устазла,  ата-анала эмда туугъан жерлерини  тарыхындан бютюн кёп билирге итиннген, аны табийгъатын  сюйген башхала да къатышхандыла.
Окъуучула, ата-анала, устазла да, жаяулай, Бызынгыдан, Шыкъы элде Мечиланы Кязимни юйюне атланнгандыла. Жолоучулукъгъа 6-чы классны географиядан устазы Джаббарлы Гюлчатин Джабаровна башчылыкъ этгенди. Устаз сабийлеге акъылман Кязимни юйю, музей болгъандан тышында, шайырны жылыуун, жазмаларын, жашау турмушун сакълагъанын айтханды. 
Окъуучула анда Мечиланы Кязимни назмуларын ана тилде окъугъандыла. Маданият бла адабият бош сёзле болмагъанларын, быллай жолоучулукъла миллетибизни ич сырын ангыларгъа болушханларын тамам оюмлагъандыла. Устазла, таматала да сабийлеге кёп сейир хапар айтхандыла. 
Гюрбежиде Кязим хажи хайырланнган кёрюк, темир тюйюучю, тёш, таш тапкала, башха керекле да сакъланнгандыла. Алагъа да окъуучула сейир этип къарагъандыла, устазларыны хапарына сюйюп тынгылагъандыла,  соруула да бергендиле. Къысхасы, ол кюн сабийле, таматала да ёлчемсиз зауукълукъ тапхандыла.
Быллай жолоучулукъла табийгъатыбызны ариулугъун, эллерибизни сейир тарыхларын шартлайдыла, сабийлени табийгъатны сюерге, илму тинтиулеге къошулургъа юйретедиле.

МУХТАРЛАНЫ Айза.