Кёп болмай КъМР-ни саулукъ сакълау министри  Рустам Калибатов, Нальчикде  Психиатрия бла  наркология араны жокълап,  сабийлеге бакъгъан  кесегинде ремонт ишле къалай баргъанларына къарагъанды, деп билдириледи ведомствону пресс-службасындан.

Мекямны уллулугъу 2 минг квадрат метрден асламды.  Келир заманда  мында сабийлеге ментал жаны бла саулукъларын игилендириу ара ачыллыкъды. Анга деп КъМР-ни Башчысыны буйругъу бла республикалы бюджетден 82,5 миллион сом бёлюннгенди. Мында суткала бла жатханлагъа эмда  кюндюз багъылгъанлагъа да жерле къураллыкъдыла.

Бюгюнлюкде къурулушчула тынгылы ремонт этип башларча жумушла бла кюрешедиле. Ол санда юйню башында къанжалларын, агъачларын,   ток чыбыкъланы эм башха инженер коммуникацияланы да кетередиле.  Аны бла бирге араны аллында машинала тохтарча майданчыкъны мурдорун да салып башлагъандыла.  

  Министр кёргенине бюсюрегенди, талай шарт бла байламлы  эсгертиуле да этгенди. Къурулуш биригиуню таматасы бла проектни къурамын да сюзгенди.  Ол санда учреждение жангы излемлеге келиширге керек болгъанын  эмда объект болжалдан кеч къалмай хайырланыргъа берилирирге кереклисин да эсге салгъанды.  Битеу жангыртыу ишлени келир жыл тамамлап бошаргъа белгиленеди.

Магометланы Сулейман хазырлагъанды.