Къэбэрдей-Балъкъэрым лэжьыгъэ IуэхукIэ къэкIуащ УФ-м и Президентым и полномочнэ лIыкIуэу КИФЩI-м щыIэ Чайкэ Юрий. КъБР-м и Iэтащхьэ КIуэкIуэ Казбек и напэкIуэцIым щытепсэлъыхьащ абыхэм я зэIущIэр зэрекIуэкIам. 

«Республикэм и экономикэ-жылагъуэ ­гъащIэмрэ политическэ щытыкIэмрэ зы­хуэдэм дытепсэлъыхьащ Юрий Яков и ­къуэмрэ сэрэ. Нэхъыбэу зи гугъу тщIар дзэ Iуэху хэхам хэтхэмрэ абыхэм я унагъуэхэмрэ зэрызащIэдгъакъуэ щIыкIэрщ». 
КIуэкIуэ Казбек полномочнэ лIыкIуэр щыгъуазэ ищIащ республикэм и макроэко­номикэм блэкIа мазибгъум зэрызихъуэжам. КъБР-м и бюджетым иIэ хэхъуэр а пIалъэм къриубыдэу меларди 2,9-м нэсащ. Ар илъэс блэкIам елъытауэ процент 19-кIэ нэхъыбэщ. 
ЩIышылэ - фокIадэ мазэхэм къриубы­дэу, туристхэм я бжыгъэр мелуан 1,5-м нэсащ, ар илъэс блэкIам елъытауэ проценти 5-кIэ нэхъыбэщ. Тырныауз ятIэпс къызэ­рыщехар и щхьэусыгъуэу, а бжыгъэр игъэ­мэщIащ. КIуэкIуэ Казбек Чайкэ Юрий ­щыгъуазэ ищIащ ­гъуэгухэми абыхэм пэ­гъунэгъу IуэхущIапIэхэми ятIэпсыр зэ­ры­тра­гъэ­бзы­кIыжам. Зэраныгъэ зыгъуэта кIэнауэр зэ­ра­гъэ­пэ­щыж иджыпстукIэ, кIэнауэщIэм и проектым йолэжь. Къинэ­мы­щIауэ, IэщIагъэлI­хэр зэхуоплъ, а щIы­пIэр ­хъурейуэ къэзы­кIухь гъуэгуитIым я проектхэм дэтхэнэр нэхъыфIу щытми. 
КIуэкIуэ Казбек Чайкэ Юрий фIыщIэ ­хуищIащ республикэр и гулъытэ зэрыщимыгъащIэм, сыт и лъэныкъуэкIи чэнджэ­щэгъурэ щIэгъэкъуэнрэ къызэрыхуэхъум папщIэ.