Османланы Якубну къызы Жамиля педагогикада урунуу жолун Къабарты-Малкъар къырал университетден сора башлагъанды. Окъууун бошагъанлай, ол, элине къайтып, сабий садда юйретиучю болуп ишлеп тебиреген эди. Бир ауукъ заманны элде устазлыкъ этип, сабийлени орус тилден бла адабиятдан да окъутханды, мектепни таматасыны окъутуу-юйретиу иш жаны бла орунбасары да болгъанды. Бюгюнлюкде Жамиля Лашкутада сабий садха башчылыкъ этеди. Ол бизни ушакъ нёгерибизди.
- Шёндюгю дунияда кёп тюрлю усталыкъ алыргъа онгла бардыла, алай жюрегинг тартханны сайлагъан а тынч болмагъан сунама.
- Хар кимни да жолу, мураты, хунери энчидиле. Белгили педагог К.Д.Ушинскийни: «Сен сюйген ишинги сайлаялсанг эмда анга битеу жюрегинг бла берилсенг, насып сени кеси табарыкъды», - деген сёзлерин бир заманда да унутмайма. Анга кёре мен насыплыма, сюйген ишим барды, аны бет жарыкълы тамамларгъа кюрешеме.
Педагогикадан сынауум байды, устазча да ишиме хар заманда уллу жууаплылыкъ бла къарагъанма. Бюгюнлюкде тюрлю-тюрлю ишледе атларын айтдыргъан окъуучуларым бла ёхтемленирге боллукъма.
- Сабий садда ишлер ючюн, бютюн уллу жууаплылыкъ керек болгъаны баямды. Ата-анала бек багъалы затларын сизге ышанып келтиредиле.
- Мен сабийлени окъутуу эмда юйретиу жаны бла ишлегенли отуз сегиз жыл болуп келеди. Аллай бир заманны ичинде сайлагъан усталыгъыма бир кере да сокъуранмагъанма. Айхай да, жууаплылыкъ уллуду, ол тёзюмлюкню, сабырлыкъны, жюрек халаллыкъны да излейди. Алай бек алгъа сабийлени сюерге керекди, аланы саулукъларындан сора да, билимлери айнырына къайгъырыргъа тийишлиди.
Кесими юсюмден айтсам, къадарыма ыразыма. Кюн сайын эрттенликде ишге келсем, сабийле санга жарыкъ кёзчюклери бла тюбеселе, жюрегинг къууанчдан толады. Талай жыл озгъандан сора тюбегенлеринде, сабий садны заманларында алагъа къалай иги болгъанынгы айтып эсгерселе, олду ишинге берилген бийик багъа. Ма ол затдан сени жюрегинг къууанады, хошлукъ табаса. Ол а усталыкъны тюз сайлагъанынгы шагъатыды.
- Сабийлени тийишлисича окъутур эмда юйретир ючюн, устаз, юйретиучю да кеслери да билимли болургъа керекдиле.
- Ол алайды, заман а тохтаусуз алгъа барады, ишибизни къыйматын кётюрюу жаны бла жангы онгла, амалла да чыгъадыла, аланы билмей, ишибизни бардырыр амал жокъду. Аны ючюн деп мен кёп журналла окъуйма, конференциялагъа къатышама. Андан сора да, насыпха, жашауумда, ишимде да къатымда кючюме, билимиме ийнаныулукъ берген, болушхан адамла бардыла. Садда бюгюнлюкде хар зат да тап эмда тынгылы эсе, ол къуру мени къолумдан келген иш тюйюлдю, анда битеу коллективни къыйыны уллуду. Басхан районну администрациясына да битеу башламчылыкъларыбызгъа, ишлерибизге да себеплик этип тургъаны ючюн жюрек ыразылыгъымы билдирирге сюеме.
Къысхасы, балалагъа, устазлагъа да айнырча битеу онгла бардыла. Аланы барыбыз да толусунлай хайырланыргъа итинебиз.
- Арт жыллада республикада, мектеплени бла школгъа дери билим берген учрежденияланы ишлеуге, алгъыннгыларын жангыртыугъа уллу эс бурулады. Сизде уа къаллай тюрлениуле болгъандыла?
-Мен башчылыкъ этип башлагъанымда, мекям тапсызыракъ эди. Мында ишлегенле бла бирге тёгерегин сюртгенбиз, ичин да тизгинли этгенбиз, арбазына гюлле, юлкюле салгъанбыз. Дагъыда район управление сабийчикле ойнагъан жерге ала жыгъылгъанда ачымазча жумушакъ зат салгъандыла. Энди сабийле сюйюп келедиле эмда аналарына: "Къарачы, бизде къалай ариуду!"- деп, ёхтемленип айтадыла. Ырысхы-техника онгларыбыз да да аман тюйюлдюле.
2026 жылда февральда уа садха тынгылы ремонт этерге деп оноу чыгъарылгъанды. Биз ол шартха бек къууанабыз. Анга районну администрациясы себеплик этгенин да белгилерчады.
Алайды да, тюрлениуле кёпдюле, алай а жаланда бир зат тюрленмей къалады – юйретиучюлени ишлерине жууаплы кёзден къарагъанлары, ариу тиллиликлери, жюрек халаллыкълары.
Бизде, керти окъуна, ишлерин билген, аны жюреклери бла сюйген, чыгъармачы хунерлери болгъан адамла урунадыла. Ала район, республикалы конкурслагъа да къатышадыла, хорламлы да боладыла.
Муратларыбызны юслеринден айтсагъ а, ала кёпдюле, алай бек башы - бизге бусагъатда алтмыш сабий жюрюйдю, садда уа жюз балагъа жер барды, сабийле бютюн кёп туусала сюебиз.
- Коллективни бек махтадыгъыз, анга ыразы болгъаны кёрюнеди, аланы сайлап ала болурсуз?
- Къайсы оноучуну да иши командасына кёре болады. Башында да бир айтханма, сабийле бла ишлер ючюн, аланы сюерге керекди деп. Мен бек алгъа ма анга эс бурама. Андан сора уа адамны билимине, жарашыулугъуна да къарайма. Иги юйретиучю, профессионал болуу бла чекленип къалмай, айтырын, этерин да билген, намысы-сыйы да жюрюген адам болургъа керекди.
Ушакъны Холаланы Марзият бардыргъанды.
