Китайм и Циндао къалэм мы махуэхэм щекIуэкIа «Гран-при» IJF дунейпсо зэхьэзэхуэм Къэбэрдей-Балъкъэрым и спортсмен Абазэ Астемыр Урысей Федерацэм и командэ къыхэхам хэту дыщэ медаль къихьащ.
УФ-м щIыхь зиIэ и тренер Джэданэ Залым и гъэсэн, Мароккэм и къалащхьэ Касабланкэ мы гъэм щызэхэта «Африкэм и Кубокым» етIуанэ щыхъуа адыгэ щIалэм зэIущIиплI къыщыпэщылъат Китайми, псоми щытекIуащ.
Килограмм 90 зи хьэлъагъхэм я деж щыбанэ Астемыр япэщIыкIэ къыпэщIэтащ Бахрейным и ныпым щIэту зыкъэзыгъэлъагъуэ Сагаипов Исрапил икIи «юко»-кIэ зэIущIэр абы къыфIихьащ. АдэкIэ, финалым и Iыхьэ плIанэм, Абазэм хигъэщIащ Китайм и бэнакIуэ Ван Бу. Адыгэ щIалэм абы тригъэкIуэдар секунд 19-щ.
Зэхьэзэхуэм и Iыхьэ ныкъуэм Абазэр IущIащ Польшэм и бэнакIуэ Джималь Павел, ауэ зы дакъикъэрэ ныкъуэрэ нэхъыбэ утыкум ари иригъэтакъым. Къэбэрдей-Балъкъэрым и бэнакIуэр финалым щыхуэзащ румын дзюдоист Висан Влад. Мыбдежми Астемыр нэхъ лъэщу къыщIэкIащ: япэщIыкIэ «юко»-р къилэжьащ, зэIущIэм зэрыщIидзэрэ иджыри зы дакъикъэ дэмыкIауэ. Абы къыкIэлъыкIуэу «иппон» Iэмалыр игъэзащIэри, хьэрхуэрэгъур хигъэщIащ.
«Япэу сызыхэта мы «Гран-при»-р, си гугъэмкIэ, схуэугъурлащ. Япэ зэIущIэм хухэха зэманыр икIэм нэсащ, текIуар зэхэмыкIыу, абы къыдыщIагъужа дакъикъэхэращ баллыр къыщысхуэхьар, сыту жыпIэмэ, Исрапилрэ сэрэ дызэроцIыху, щхьэж и бэнэкIэми фIыуэ тIури дыщыгъуазэщ. Абы иужькIэ зыкъызэкъуэсхын щIэздзащ.
Тренерхэм къалэн гурыIуэгъуэхэр къысхуагъэувырт, ахэр зэрызгъэзэщIэным сэри сыхущIэкъуащ финалым сынэсыху. Абы къыщыспэщIэхуа румын бэнакIуэр сцIыхуртэкъым, ауэ си тренерхэм я чэнджэщхэр сэбэп къыщысхуэхъуащ мыбдежми.
Дауи, дунейпсо утыкушхуэхэм къихьэн щIэздзауэ аращи, нобэрей текIуэныгъэм мыхьэнэшхуэ иIэщ си дежкIэ. Си тренерым зэрыжиIэщи: зэхьэзэхуэ цIыкIу щыIэкъым. Сэри апхуэдэущ абы сызэреплъыр. Циндао къалэм щысхузэфIэкIащ дзюдо «иным» лъэбакъуэфI хэсчэн», - яжриIащ журналистхэм Абазэ Астемыр зэIущIэ нэужьым.
Иджы екIуэкIа зэхьэзэхуэр нэхъ лъэщхэм хохьэ и мыхьэнэкIэ, дунейпсо рейтинг баллхэри щагъэджэгу. Зэпеуэм хэтащ къэрал 40-м я дзюдоист лъэщхэр.
Адыгэ щIалэ Абазэ Астемыр мыпхуэдэ зэхьэзэхуэр и япэу аращ икIи дыщэ медалкIэ ар къыщIидзащи, дехъуэхъунщ и зэфIэкIым адэкIи хигъэхъуэну, республикэм и щIыхьыр лъагэу иIэту, текIуэныгъэ дахэхэмкIэ куэдрэ дигъэгуфIэну, япэ увыпIэм и лъабжьэ къэмыкIуэну.
ХЬЭЩЫКЪУЕЙ Олег.
