Байрым кюн Тырныаууз шахарда Къулий Къайсын атлы район маданият юйде Совет Союзну Жигити Байсолтанланы Алимни бла аны биргесине къуллукъ этген нёгерлерини юслеринден «Незаконченное танго» деген китапны халкъгъа туура этиу болгъанды. Ары келгенле бек алгъа кёрмюч бла шагъырейленнгендиле. Анда кёргюзтюлген экспонатланы араларында жигитни юсюнден 20 жыл мындан алгъа жарашдырылгъан биринчи китап да бар эди.

Бу эки китапны да автору КъМР-ни бла КъЧР-ни сыйлы артисти Мызыланы Таубийди.

Мызы улу китапларын жазарны аллында архивледе кёп заманын ётдюргенди. Излеу-тинтиу иш жылла бла бардырылгъанды. Быйыл чыкъгъан китапны уа Таубий Сафарович анасыны къарындашыны муратын толтурур ючюн чыгъаргъанды. ... Уруш башланнган кече Байсолтан улу бла тенглери окъууларын бошагъанларыны къууанчын эте эдиле. Сора ала тангону тепсей тургъан кезиуде ачы къуугъун келеди да, байрам бошалады. Алим а ол кюн тенглерине сёз береди урушдан сора барысыны да юслеринден китап жазаргъа эм анга «Незаконченное танго» деп атаргъа...

Маданият юйде ётген къууанчлы жыйылыугъа келгенлени бла сыйлы къонакъланы алларында уа Элбрус районну администрациясыны башчысыны орунбасары Толгъурланы Расул сёлешгенди. Ол Таубий Сафаровичге этген иши ючюн ыразылыгъын билдирип, Ыспас къагъыт бла белгилегенди.

Байрамгъа энчи къууат салгъанладан бирлери уа Отарланы Керим атлы 1-чи номерли лицейни школгъа дери билим берген «Алёнушка» бёлюмюню сохталары болгъандыла. Ала жигитликни бла кишиликни, Алимни да юслеринден назмула айтхандыла. «Гвардия юных байсултановцев» Уллу Хорламны 80-жыллыгъына бла Ата журтну къоруулаучуну жылына жораланып къуралгъан проектди. 

Белгили жырчыларыбыз Байсолтанланы Инара, Тебердиланы Зухура эмда Гайыланы Тахир къонакъланы кеслерини чыгъармачылыкълары бла къууандыргъандыла. 
Ызы бла уа жигитни юсюнден жарашдырылгъан видеофильм да кёргюзтюлгенди. Жыйылыу, Байсолтан улун эсгере, бир минут шош туруу бла бошалгъанды. 

Къасымланы Аминат.