РФ-ни Эл мюлк министерствосу «Эл жерлени комплекс халда айнытыу» къырал программаны чеклеринде «МедиаПоле» деген миллет премияны бардырады. Анга кёре регионладан авторла элни айнытырча не мадар этилгенини юсюнден ишлери бла шагъырейлендирликдиле.

Премияны магъанасы – эл жерлени айнытыугъа къайгъыргъан медиаконтентни авторларына себеплик этергеди эм жаш адамланы бу жанына эслерин бурургъады.  

«МедиаПоле» миллет проектге Россей Федерацияны инсанларындан онсегиз жыллары толгъан: энчи авторла, блогерле, студентле, жаш специалистле эм медиаконтентни авторлары къатышыргъа боллукъдула. 

Заявканы келир айны 17-не дери берирге жарайды. Алай бла ноябрьни ахырында финалистле Москвагъа атланырыкъдыла. Анда эки кюнню ичинде ишчи программагъа къатышырыкъдыла, ол санда белгили блогерле, экспертле бла танышырыкъдыла эм айырмалы медиа аралада боллукъдула.

Хорлагъанла РФ-ни Эл мюлк министерствосуну дипломларына бла ахча саугъа алырча сертификатларына тийишли боллукъдула. 

Проектни юсюнден толуракъ билирге сюйген медиа поле.рф сайтда эм социал сетьледе табарыкъды.

Экспортха аслам продукция жибериледи

Къабарты-Малкъарда 2019-2024 жыллада агропромышленный комплекс бла байламлы экспортха жиберилген продукцияны ёлчеми 2,7 кереге ёсгенди. Республика кёбюсюнде мирзеу, татлы ашарыкъла, алкоголь ичгиле, суусапла, спирт, нартюхден крахмал, комбикорма, къыймала, этден этилген ашарыкъла, тахта кёгетледен консервала эм башха затла да сатады.

Бюгюнлюкде республика сагъынылгъан продукцияны жыйырмагъа жууукъ къыралгъа жибереди. Болсада келир заманда жерчиликде уруннганла ассортиментни кёбейтирге эм ры-нокну да кенгертирге таукелдиле.

Сурамгъа жыл сайын къошула баргъаны продукцияны игилигин, аны бла бирге конкуренцияны кезиуюнде кесини жерин да тапханын ачыкълайды.

 Чеплеуден бай тирлик

Къабарты-Малкъарны эл мюлклеринде чеплеуню оруп башлагъандыла, бюгюнлюкде аны эки минг гектарда кетергендиле. Саулай алып айтханда, чеплеу 17 минг гектаргъа жууукъда орнатылгъанды. Ол толусунлай былтыргъы кёрюмдюге келишеди.

Сагъынылгъан битимни иги кесеги неда 80 проценти Прохладна, Бахсан, Зольск эм Май районлагъа жетеди.

Сабанлыкълада болумгъа кёре, жерчиликде уруннганла бирси жылладан эсе бай тирлик алыр муратлыдыла.

Магометланы Сулейман.