«Туризмни бла краеведенияны школу» деген проект кюз артында тындырырча бир ненча магъаналы жумушну белгилеп, аланы тамамлауну мадарларын этеди. 
Бу башламчылыкъны таматасы Мокъаланы Тенгиз белгилегенича, жууукъ кезиуде ала Нальчикни тийресинде бек бийик Нарт уя таугъа атланырыкъдыла. Озгъан ыйыкъда уа солуу паркны тийресинде  школчула бла практика дерс бардыргъандыла. Жаш тёлюге сууну башы бла бир жагъасындан экинчисине тагъылгъан жыжым бла, альпинист эм турист кереклени хайырлана, ётерге керек эдиле. Ол юйрениулени сабийле бла КъМР-ни сыйлы къутхарыучусу Андрей Ремизов эмда Волонтёрланы къыйын болумлагъа хазырлау жаны бла араны башчысы Андрей Смолин бардыргъандыла. 
Бу проектни чеклеринде школчуладан къауум къураллыкъды, аланы биринчи болушлукъ берирге эм туризмни бла къаялагъа ёрлеуню  жашырынларына юйретирикдиле. Сора сабийлени хазырлыкъларына кёре, Ара Кавказны бийик тау тийрелерине да жолоучулукъла къураллыкъдыла.
Эсигизге салайыкъ, «Туризмни бла краеведенияны школу»  проект Орус география биригиуню регион бёлюмюню, КъМР-ни Курортла эм туризм министерствосуну эмда От тюшюу-къутхарыу службаны болушлукълары бла бардырылады. 

Таппасханланы Аминат.