Герпегежде элни администрациясыны башчысы Уяналаны Хамид Маданият юйню директору Гайыланы Лейля бла жашлары энчи аскер операциягъа къатыша тургъан аналаны тюбешиулерин къурагъандыла.
Быллай тюбешиу хар анагъа, юй бийчеге да магъаналы эди. Ала бир бирлери бла ушакъ этгендиле, жарсыуларын, къайгъыларын да айтхандыла. Ала жандауурлукъ, бир бирге билеклик этерге, жапсарыргъа кюрешгендиле.
Тюбешиу шуёх, жюрек жылыу, ачыкълыкъ халда ётгенди. Аны башлай, Уяналаны Хамид: «Биз билебиз, сиз Ата журтну тынчлыкълы жашауун къорууларгъа баргъан жашларыгъызны бир такъыйкъагъа да унутмайсыз, алай бюгюн ол къайгъыларыгъызны бир кесек окъуна чачар умут бла жыйгъанбыз бери. Сизни бла бирге жууукъ заманда мамыр жашаугъа къайтырыгъыбызгъа, жашларыбыз сау-саламат къайтырыкъларына ийнанабыз», – дегенди.
Андан сора ол аланы гитче элинден энчи аскер операциягъа къатышыргъа жыйырма беш жаш баргъаны бла ёхтемленнгенин да айтханды. «Аланы бир къауумлары бийик къырал саугъалагъа тийишли болгъандыла. Ол а жерлешлерибизни кишиликлерине шагъатлыкъ этген шартды. Биз ала бла не заманда да ёхтемленирикбиз, ёсюп келген тёлюге уа ала жигитликни бла адамлыкъны юлгюсю болгъанлай къаллыкъдыла», – деп чертгенди.
Гайыланы Лейля уа быллай тюбешиулени мындан ары да бардыра турлукъларына ышандыргъанды. «Биз къазауат эте тургъан жигитлерибиз бла байламлыкъ жюрютебиз, аланы жетишимлерин билебиз, белгилейбиз, мындан да алагъа хапар айтабыз. Ала юйюрлери ючюн жарсымазча этер ючюн къолубуздан келгенни аярыкъ тюйюлбюз», – дегенди.
Бу тюбешиуню къурагъанла Герпегежни къатында кёлню иеси Гуртуланы Назирге энчи ыразылыкъларын билдиредиле. Ол аналаны татыулу чабакъла бла сыйлагъанды.
Къонакъла, къонакъбайла да, хант столла артларында олтура, кёп ушакъ этгендиле, бир бирге огъурлу сёзле айтхандыла, аскерчи жашларыбыз жууукъ заманда сау-саламат юйлерине хорлам бла къайтып къууандырырларын сюйгенлерин билдиргендиле.
Холаланы Марзият.
