Жыйырма алтынчы сентябрьде Музыка театрда «Уллу гастрольла» Битеуроссей проектни чегинде Адыгея Республикадан Къабарты-Малкъаргъа тёрт спектакль бла келген А.Ханаху атлы Камерный музыка театрны келечилери пресс-конференция бергендиле. 

Театрны художестволу  башчысы Юнус Сулейманов театргъа отуз эки жыл болгъанын айтханды. «Алай арт жыллада кадрланы къыйналып табабыз, – дегенди ол. – Мен кесим ГИТИС-ни бошагъанма, бизни музыка театрлада режиссёрла болуп ишлерге хазырлагъан эдиле. Сау студия баргъан эдик ол заманда Москвагъа. Бусагъатда студияла  жибермейдиле,  кесибиз ариу ёнлери болгъанланы излейбиз. Сизни Музыка театргъа, республикагъызгъа да бек сукъланабыз, нек дегенде Нальчикде Искусстволаны Шимал-Кавказ институту барды, музыка жаны бла специалистле тохтаусуз хазырланадыла. Ала, бийик билим алып,  Музыка театрыгъызгъа келедиле. Бизде уа сайланнган жаш адамла артда тынч-тынч билим аладыла».
Адыгеяны халкъ артисткасы Ирина Кириченко: «Мен алгъаракъда Гнесинле атлы институтда усталыгъымы ёсдюргенме, - дегенди. – Музыка театрны иши да заманнга кёре тюрленнген этеди, биз да къуруда бир кибик жырламайбыз, ауазны амаллары кёпдюле, аланы барысын да ачыкъларгъа итинебиз». 
Адыгеяны сыйлы артисти, тарых илмуланы кандидаты  Виктор Марков: «Бизде битеу театрланы барысын да бирге жыйгъандыла, къараучула бла ишлеген сау бёлюмюбюз барды. Жаш адамлагъа деп салгъан спектакльлеге студентле, школчула да келедиле. Театр юйретиу иш бла кюрешеди. Театрны тили уллугъа, гитчеге да ангылашынады. Биз Нальчикге биринчи кере келмегенбиз, «Нарт» санаторийде тохтагъанбыз да, тёгерегибизде ариулукъгъа бек сейир этебиз. Ариу жерде жашайсыз. Музыка театрыгъызда да бек кючлю, ариу ёнлю артистле бардыла» - дегенди. 
КъМР-ни сыйлы артисти, КъМР-ни Музыка театрыны директору Руслан Барагунов жууукъ заманда бизни Музыка театр Адыгеягъа гастрольлагъа барлыгъын билдиргенди. Ала да «Уллу гастрольла» проектни чегинде боллукъдула. Сёзсюз, бу проект уллу Россейде бир бирибизни таныргъа, театрла къалай ишлегенлерин билирге болушадыла.

Байсыланы  Марзият.
Сурат авторнуду.