Бу кюнледе «Къабарты-Малкъар Республиканы жигитлери» деген программаны ачылыуу болгъанды. Аны юсюнден республиканы оноучусу Казбек Коков кесини телеграм-каналында билдиргенди.

Бу регион проектди, кеси да «Жигитлени кезиулери» федерал программаны андан ары бардырыу бла байламлыды, энчи аскер операциягъа къатышханлагъа эм ветеранлагъа болушлукъ этерге бурулупду. Проект КъМР-ни Администрациясыны башчысыны,  «Эльбрус» корпоратив университетни, Къырал управленияны бийик школасыны эм мюлкню бла къырал службаны Россей академиясыны (РАНХиГС), «Россей - онглары болгъан къыралды» платформаны эм Ата журтну къоруулаучулары фондуну республикада бёлюмюню болушлукълары бла бардырылады.
Къууанчлы жыйылыуну кезиуюнде программагъа къатышханлагъа алгъыш сёзлерин башда сагъынылгъан академияны таматасыны орунбасары Евгений Подшивалов бла РАНХиГСНы Шимал-Кавказ институтуну Пятигорск шахарда бёлюмюню таматасы Азамат Тлисов айтхандыла.
Бу программаны жашауда бардырыу энчи аскер операциягъа къатышханлагъа бла ветеранлагъа усталыкъларына кёре хайырланыргъа онг берликди эм жамауат ишде, къырал эм муниципал службада да керек боллукъду. Окъуугъа къатышханланы алларында федерал экспертле, спикерле, тренерле да бардыла. Андан сора да, бу программагъа  РАНХиГС-ны келечилери, регион вузладан, властьны къырал эм муниципал службаларындан специалистлери да къатышадыла.
Окъууланы биринчи уруму 3 октябрьге дери барлыкъды, ол къырал политиканы управление системасына эм бирге ишлеуню амалларына жораланырыкъды. Айтылгъан темагъа 502 сагъат бёлюнеди, ол кезиуню ичинде айныргъа себеплик этерик сейир эм магъаналы дерсле берилликдиле. Андан сора юйретиучюле ишге тохтаргъа болушлукъ этерикдиле. Биринчи окъуу курслагъа 31 адам къатышады. Бизни жигитлерибиз окъууну жетишимли бошап, алларында тургъан борчланы тамамларгъа эм муратларына жетерлерине ийнанама, деп билдиргенди республиканы оноучусу.