Къабарты-Малкъар къырал университетде быйыл окъургъа киргенлени студентге алыуну къууанчы ётгенди. Жыл сайын бардырылгъан бу байрамгъа  быйыл 600-ге жууукъ студент бла преподаватель къатышхандыла.

Бек алгъа битеу жыйылгъанла къыралыбызны гимнине тынгылагъандыла. Ызы бла уа зачёт китапчыкълагъа къол салып, аланы жаш адамлагъа юлешиу болгъанды. Алагъа алгъыш сёз бла вузну ректоруну къуллугъун толтургъан Юрий Альтудов сёлешгенди.

- Бизни окъуу юйню сайлагъан къызлагъа бла жашлагъа ыразыбыз. Окъуу жылларыгъыз зауукълу эм хайырлы ётерле деп ышанама. Илмугъа къошумчулукъ этерсиз, кесигизни, республикабызны да атын айтдырырсыз деп ийнанама. Къабарты-Малкъарны тамблагъы кюню сизсиз, - деп чертгенди кесини къысха сёзюнде Юрий Камбулатович.  

Ызы бла жаш тёлю университетни жашауу къалай баргъаныны, къаллай эришиуле бла фестивальла ётгенлерини юсюнден видеоролик кёргюзтгендиле. «Студент жаз башы», «Аркъан» деген жаш тёлю форум окъуу юйню бай маданият эм илму жашауун ачыкълагъан проектледиле. 

Фахмулу студентлеге сёз берилгенде уа, сахнагъа Жангоразланы Лейля, Мирослава Васильченко, «Чэпщ» деген фольклор коллектив, «Кафа» миллет тепсеу ансамбль чыгъып, хунерлерин кёргюзтгендиле. Энчи сейир бла уа жыйылгъанла тыш къыраллы студентлени миллет тепсеулерине къарагъандыла. 

Къасымланы Аминат.