СКФО-да Ространснадзорну Къабарты-Малкъарда бёлюмюнде быйыл экинчи кварталда ишлерини эсебин чыгъаргъандыла.

Бу ведомство автотранспорт эмда жер башында жюрюген электрокюч транспорт бёлюмледе надзор этиу бла кюрешеди. Аны келечилери рейдле бардырадыла, тыш къыралладан жюкле ташыугъа кёз-къулакъ боладыла, жолланы таплыгъына, бизни къыралны законларына бузукълукъ этилмезча контроль бла кюрешедиле.

Контроль (надзор) жумушланы тындырыргъа чек салыннганы ючюн ведомство быйыл тинтиулени пландан тышында бардырады, сора адамланы автобусла бла ташыргъа эркинлик (лицензия) къалай берилгенин сюзеди.

Сагъынылгъан кезиуде инспекторла бузукълукъланы профилактикасына уллу эс бургъандыла, организацияланы иелерине, энчи предпринимательлеге консультацияла бергендиле эмда эсгертиуле этгендиле.

Бизни республикада пассажирлени ташыу бла кюрешген 796 организация бла энчи предприниматель бардыла, ол санда 52 си – башха къыраллагъа жюрюйдюле. Тийишли тизмеге 1886 автобус тюшгенди. Къоркъуулу жюкле ташыргъа эркинликлери 18 организацияда барды, сабийлени мектеплеге уа 227 автобусда 185 компания бла энчи предприниматель жетдиредиле.

Рейдле бардырылгъан кезиуледе инспекторла 138 улоуну тинтгендиле, аладан 118-де бузукълукъла табып, 157 постановление (тазирлеге) жазгъандыла. Ала бегирекда транспорт средстволада тахографла, ЭРА-ГЛОНАСС аппаратла эмда страховкала болуруна, сора сабийлени къоркъуусузлукълары нечик жалчытылыннганына, къоркъуулу жюклени ташыугъа къарай эдиле. Дагъыда водительле заманында солургъа керек болгъанларын унутмай эсге салгъандыла.

Башха къыралладан неда ала таба жюкле ташыуну юсюнден айтханда, экинчи кварталда ведомствону келечилери 883 улоуну тыйып тинтгендиле, 676 бузукълукъ ачыкълап, аллай бир постановления жазгъандыла.

Ауур автомашиналаны (12 тоннадан артыкъ тартхан) жолгъа чыгъаргъаны ючюн тёлеу берирге керекди. Аны бермегенлеге да бу кезиуде къолларына 124 постановление тутдургъандыла. Саулай айтханда уа, быйыл биринчи эки кварталны ичинде административ жууапха тартыу бла байламлы 1400 постановление жазылгъанды.

Омарланы Мурат хазырлагъанды.