Бахъсэн щIыналъэм хыхьэ Куба къуажэм ЩэнхабзэмкIэ и унэм иджыблагъэ щызэхэтащ адыгэ уса­кIуэ, тхакIуэ, адыгэ литературэм и лъабжьэр зыгъэтIылъа, ­КъБАССР-м гъуазджэхэмкIэ щIыхь зиIэ и лэ­жьакIуэ ЩоджэнцIыкIу Алий и фэ­еплъ пщыхьэщхьэ.
Зэхуэсым кърагъэблэгъат щIы­налъэм, къуажэм я администрацэ­хэм я унафэщIхэр, щэнхабзэ, егъэ­джэныгъэ IэнатIэхэм я лэжьакIуэхэр, жылэдэс нэхъыжьхэм я советым и лIыкIуэхэр, щIалэгъуалэр.
ЩэнхабзэмкIэ унэм и унафэщI ­Шыкуэ Мадинэ и нэIэ щIэту еджа­кIуэхэм къызэрагъэпэщат сурэтхэм-рэ тхылъхэмрэ щызэхуэхьэса выс­тавкэ, «ЩIымахуэ жэщ» поэмэм къыт­ращIыкIа теплъэгъуэ, апхуэдэуи ныбжьыщIэхэр къеджащ Алий и усэхэм, и нэгъуэщI тхыгъэхэм щыщ Iыхьэхэм.
Пшыхьым къекIуэлIахэм псом хуэ­мыдэу гунэс ящыхъуащ ЩоджэнцIыкIум и тхыгъэхэм къытращIыкIа театр теплъэгъуэхэр, усакIуэм и Iэ­дакъэщIэкIхэм лъабжьэ яхуищIа гу­рыщIэхэр нэсу зыхозыгъащIэу ягъэувахэр.
Бахъсэн щIыналъэ администра-цэм и унафэщIым и къуэдзэ Iэхъуэ­-бэч Анзор къыщыпсалъэм фIыщIэ яхуи­щIащ зэIущIэ гукъинэжыр къы­зэзыгъэпэщахэми абы жану хэта ­ныбжьыщIэхэми. Апхуэдэуи абы жи­Iащ щIалэгъуалэр хэку литературэм зэрыщыгъуазэр, ахэр ди тхакIуэхэм я IэдакъэщIэкIхэм дихьэхыу зэреджэр и гуапэ зэрыхъур. Апхуэдэу щыщыткIэ, ди тхакIуэхэми абыхэм я къалэмыпэм къыщIэкIахэми хуэфащэ пщIэ зэрагъуэтынур и фIэщ зэры­хъури къыхигъэщащ. Ар езым и гукъэкIыжхэмкIи ядэгуэшащ пшы­- хьым кърихьэлIахэм. Школым щы­щIэсми ЩоджэнцIыкIум и тхыгъэхэр игу ирихьу щIиджыкIыу, гукIэ зригъащIэу зэрыщытар жиIащ, Алий и творчествэм теухуа республикэ ­зэпеуэм щытекIуауэ зэрыщытам зэрыригушхуэри къыхигъэщащ Iэ­хъуэ­бэчым.
Адыгэ усакIуэ щэджащэм и творчествэм нэхъ гъунэгъуу щыгъуазэ зыхуащIын папщIэ библиотекэм тхылъ­­хэр къыIихынуи Iэмал иIащ зэ­хыхьэм хэта дэтхэнэми.