Нальчикде онкология диспансерни къурулушу 2022 жылда башланнган эди. Бу кюнледе да анда иш тохтаусуз барады, деп билдиргендиле КъМР-ни Къурулуш эмда ЖКХ министерствосундан.
Бу магъаналы объект «Узакъ эмда тири жашау» миллет проектни хайырындан къурала турады. Жангы арада хар не да тынгылы этилликди. Анда 250 саусузгъа жерле (дагъыда кюндюзгю стационарында – 24) боллукъду, бир сменнге 100 инсанны жумушларына къарагъан поликлиника, багъыу бёлюмле, хирургия эмда диагностика бла терапия оборудованияла бла жалчытылыннган радиология корпусла да ишлерикдиле.
Къурулуш ишле бу комплексни битеу бёлюмлеринде барадыла. Бирлеринде специалистле къабыргъаланы сюртедиле, бояйдыла, отоу тюплеге плитка саладыла, лифтлени, хауаны алышхан системаланы да орнатадыла. Башхаларында уа электрокюч ызланы жарашдырадыла, жылытыу системаланы хазырлайдыла. Министерствода ышандыргъанларына кёре онкология диспансерни къурулушу келир жылны ахырында эбине жетерикди.

Улбашланы Мурат.