Къабарты-Малкъарны Правительствосуну кезиулю кенгешинде билим бериу, туризм, жаш тёлюню онгдуруу эмда талай башха темала бла байламлы бир ненча проектге къаралгъанды, тийишли оноула да этилгендиле. Жыйылыуну Правительствону Председатели Мусукланы Алий бардыргъанды, аны ишине министерстволаны, ведомстволаны эмда муниципалитетлени таматалары бла келечилери къатышхандыла.
Жер эмда ырысхы бла байламлы халланы министри Аслан Тохов туура этген эки буйрукъну проектлеринде республиканы иелигинден муниципалитетлеге талай объектни бериуню юсюнден айтыла эди. Биринчисине тийишлиликде Чегем район юч автобус къоллу боллукъду. Аланы барыны да багъасы 13,8 миллион сомду, муниципалитет ала ючюн абери тёлерик тюйюлдю. Прохладна район а 12,4 миллион сом багъасына окъуучулагъа изленнген оборудование эмда башха харекет алгъанды.
Министр дагъыда келишиулюк комиссиягъа тюрлениуле кийирилгени бла шагъырейлендиргенди. Ол кеси да комплекс халда кадастр ишлени бардыргъанда жер участкаланы чеклерин тохташдыргъан кезиуде къуралады.
Кенгешде республикада туризм индустрия эмда ресурсла не халда болгъанларын тинтиу жаны бла жангы низамны юсюнден да сёлешиннгенди. Аны бла байламлы документни Къабарты-Малкъарны курортла эмда туризм министрини орунбасары Асланби Шхагапсоев туура этгенди.
Къабарты-Малкъарда Жаш тёлю политиканы тамамлау стратегияны 2030 жылгъа дери бардырыуну дурус кёргендиле. Бу документ республиканы Башчысында къуралгъан Советни оноуун толтурур хыйсап бла жарашдырылгъанды. КъМР-ни жаш тёлюню ишлери жаны бла министри Азамат Люев билдиргенича, власть эмда жер-жерли органланы, граждан жамауатны институтларыны, жаш тёлю биригиулени да къыйынларын бирикдирип, аны болгъан чурумланы кетериуге бурургъа себеплик этерикди. «Бу Стратегияны чеклеринде ызы бла жаш тёлюню жашау болумларын игилендирик, жаш тёлю политика инфраструктураны айнытырыкъ, кадрланы кючлендирик, жашаугъа къарамларын иги жанына бурлукъ мадарла жарашдырыллыкъдыла. Аны хайырындан а тири, жууаплы, башхалагъа хорлатмазгъа таукелленнген, кеси да къыралны эмда республиканы айныуларына иги къошумчулукъ этерик жаш тёлю къураллыкъды», - дегенди ол.
Бегимледен бири бла акъылбалыкъ болмагъанлагъа осуйлукъ этиуню тамамларгъа деп муниципал районланы эмда шахар округланы бюджетлерине ахча жибериу низамгъа тюрлениуле кийирилгендиле. Бу оноу быллай болушлукъну быйылны ахырына дери неллай бир инсан аллыгъын ойлап этилгенди. Сёз мында ата-анасыз къалгъан сабийлеге къарауну, аланы кеслерине алып ёсдюрген адамлагъа хакъ тёлеуню эмда бир кезиулюк ахча бериуню юсюнден барады.
Жыйылыуда билим бериуню юсюнден да сёлешиннген эди. Бегимледен бири бла Ёксюз эмда ата-анасыз къалгъан сабийлени жумушларына къарагъан араны аты тюрлендирилгенди. Энди ол ишин социал жумушланы жалчытыу борчлагъа тийишлиликде башха тюрлю къурап бардырлыкъды. Къабарты-Малкъарны жарыкъландырыу эмда илму министрини орунбасары Екатерина Мисостова билдиргеннге кёре, анда окъурукъ эмда юйренирик сабийлени эркинликлерине бузукълукъ этилмегенди. Алагъа орта билим бериу жумушланы министерство кеси эмда Республикалы кёп профильли гимназия тамамларыкъдыла. Саулукъларында чекленнген онглары болгъан сабийлени уа биринчи номерли энчи школ-интернатда окъутурукъдула.
Улбашланы Мурат
хазырлагъанды
