Къабарты-Малкъардан «Шагди» деген миллет тепсеу ансамбль алгъаракъда Къытайда ётген «Алтын майдан» халкъла аралы конкурс-фестивальда «Айырмалыланы арасында биринчи» саугъагъа эмда беш номинацияда биринчи даражалы дипломлагъа тийишли болгъанды, деп айтылады КъМР-ни Правительствосуну интернет-порталында.

Фестиваль Циньхуандао шахарда 8-15 сентябрьде бардырылгъанды. Бу ансамбльни къауумунда уа 51 адам бар эди. Коллектив анда юч тепсеу кёргюзтгенди эмда «Эки халкъ – эки къанат» деген, кеси да таулуланы бла къабартылыланы шуёхлукъларын бийикге кётюрген байрам ингир къурагъанды. Жюри кёргенин бек жаратып алагъа уллу багъа бергенди.

«Бизни ары фестивальны президенти чакъыргъан эди. Ол ары дери да ансамбльни тепсеулерин тюрлю-тюрлю жерледе кёрюп тургъанды. Конкурсха хазырланыргъа жаланда ай бла жарым заманыбыз бар эди. Ары дери биз Иорданиягъа барып келген эдик», - дегенди «Шагди» ансамбльни башчысы, КъМР-ни культурасыны сыйлы къуллукъчусу Зарема Унажокова.

«Анда программа бек бай болгъанды. Фестиваль ачылгъан кюнде биз Бэйдайхэ курорт шахарны ара орамында къууанчлы жумушха къатышханбыз. Конкурсну биринчи кюнюнде аламат тепсеулерибизден бирин кёргюзтгенбиз. Гитче тепсеучюлерибизни къараучула къарс къагъып бек жылы тюбегендиле. Андан сора жюрини, башха коллективлени келечилери, къараучула да къатыбызгъа келип, кёргенлерин бек жаратханларын жашырын этмей айта эдиле. Биз Къытайгъа баргъаныбызгъа, анда болгъан кезиуюбюзге, аллай аламат жумушха къатышханыбызгъа бек ыразы болгъанбыз», - деп къошханды хореограф.

Тёрели культураны фестивали Къытайда жыл сайын бардырылады. Аны магъанасы: миллет чыгъармачылыкъгъа себеплик этиудю, жер башында жашагъан халкъланы тин-маданият байлыкъларын ачыкълауду, Къытайны бла Россейни, сора миллетлени араларында культура байламлыкъланы кючлендириудю. Шимал Кавказдан быйыл анда жаланда «Шагди» болгъанды, дагъыда Россейден отуз регионну делегациялары – эки минг чакълы адам къатышхандыла. Бары да жетмишден артыкъ концерт программа кёргюзтгендиле.

Омарланы Мурат хазырлагъанды.