Къэбэрдей-Балъкъэрым и мэкъумэшыщIэхэм зыхуагъэувыжа пIалъэм тету бжьыхьэ губгъуэ лэжьыгъэхэм жыджэру зыхуагъэхьэзыр. ИджыпстукIэ япэ ирагъэщыр жылапхъэхэр зыхуэдэм кIэлъыплъынращи, ахэр зрикъунум хуэдизу щыIэщ - я нэхъыбэр ди къэралым къыщагъэкIауэ.

Апхуэдэуи мэкъумэшыщIэхэм щIыгъэпшэрхэр, къэкIыгъэхэм къапкърыхьэ хабзэ узыфэхэм зэребэныну хущхъуэхэр, н.къ. кърашалIэ. Абыхэм къадэкIуэу, бжьыхьэсэ лэжьыгъэхэр ныкъусаныгъэншэу ирагъэкIуэкIыфын хуэдэу, мэкъумэш техникэхэмрэ гъэсыныпхъэхэмкIи нэсу къызэгъэпэща хъуащ.

Я мурадщ илъэс къэс бжьыхьэсэр ику иту зытращIэ щIым и куэдагъым мы гъэми темыкIыну - гектар мин 60-м щIигъум. Мэкъумэш къэкIыгъэхэм ящыщу бжьыхьэсэм и процент 80-м щIигъур гуэдзым къылъос, адрей къэнар хьэмрэ тритикалемрэщ. 

Къэбэрдей-Балъкъэрым бжьыхьэсэ лэжьыгъэхэр щрагъажьэр, абыхэм щхьэкIэ щыIэ мэкъумэш-техникэ пIалъэм тещIыхьауэ, фокIадэм и кIэхэр – жэпуэгъуэм и пэщIэдзэ махуэхэрщ.

ХЬЭЩОКЪУЭ Алыдж.