ЦIыхур зыхуэдэр къызэралъытэ пщалъэхэм ящыщщ абы и Iэужьыр. Аращ зэлъытыжар  жылагъуэм щиIэну пщIэри. Зи IуэхущIафэ дахэхэм зи цIэр фIыкIэ ягъэIуа цIыху щыпкъэщ «Кавказские Минеральные Во­ды» ООО-м и унафэщI Дзыхь­мыщI Заур Башир къуэр. «IуэхуфI зи бащэ лIы телъыджэщ»   хужаIэ   абыи дуней тетыкIэм фIыуэ щыгъуазэхэм. НаIуэ зэрыхъуащи, а псалъэхэр Заур къызэрилэжьар и къулыкъуракъым, бгъэдэлъ мылъкуракъым, атIэ Iэужь дахэу къы­зэ­ринэкIырщ, и псапэхуэщIэ  Iуэ­ху­хэрщ. 

ДзыхьмыщI Заур лъэпкъкIэ Хьэтуей къуажэм щыщщ, ауэ жылэм зэи дэмысами, и лIакъуэр къыщежьэ хэку цIыкIум къуэпс быдэкIэ пыщIащ. А къуажэр зэрилъытэм, хуиIэ пыщIэныгъэм и щыхьэтщ абы и зыужьыныгъэм хуэгъэпсауэ зэфIигъэкI Iуэху щхьэ­пэхэр. ДзыхьмыщIым и зэ­фIэкI псори къытхуэмыгъэлъа­гъуэми, Хьэтуейм нобэ и зэIу­зэ­пэщ псэукIэм абы и гуащIэ зэ­ры­хэлъымрэ къуажэдэсхэм дэIэ­пыкъуэгъу зэрахуэхъумрэ къы­­­хэдмыгъэщын тхузэфIэкIынукъым, ар жылэдэсхэм я лъэIущи. 
БлэкIар зылъытэ, къэкIуэнум фIыкIэ хуэплъэ хэкупсэ нэсщ ДзыхьмыщIыр. Къуажэдэсхэм гуапэу ягу къинащ Хэку зауэш­хуэм и ветеранхэм сытым дежи пщIэ яхуищIу зэрыщытар. Илъэс къэскIэ ахэр игъэгушхуэрт ахъшэ саугъэткIэ, нэхъ зыхуэныкъуэнкIэ хъуну къилъытэ хьэпшыпкIэ. ­Заур нобэ апхуэдэ дыдэ гулъытэ яхуещI дзэ Iуэху хэхам хэтхэми. Ахэр зыхуэныкъуэ дэIэпыкъуныгъэр мызэ-мытIэу къахузэригъэ­пэщащ, апхуэдэуи зыщIэ­лъэ­Iуа хьэпшыпхэр яхуишэри, езыри щыIащ щIалэхэм къулыкъур щра­хьэкI щIыпIэм. Къищы­нэ­мыщIауэ, дзэ Iуэху хэхам хэкIуэдахэм я унагъуэхэми дэIэпы­къуэгъу яхуохъу.
Ди зауэлIхэр зэрыдиIыгъым папщIэ абы къыхуагъэфэщащ «Хэкум и хъумакIуэхэр» фондым и Къэбэрдей-Балъкъэр къудамэм и унафэщI Дадэ МуIэед къыбгъэдэкI ФIыщIэ тхыгъэр, «Гуманитар дэIэпыкъуныгъэхэм зэрыхэтам папщIэ» медалыр, КъБР-м и ДОСААФ-м и ЩIыхь тхы­лъыр.
Къыхэгъэщыпхъэщ ТекIуэныгъэр илъэс 80 зэрырикъур Хьэ­туей къуажэм зыхуей хуэзэу зэрыщагъэлъэпIам Дзы­хь­мы­щIым и фIыщIэшхуэ зэрыхэ-лъыр. Махуэшхуэм ирихьэлIэу абы и мылъкукIэ зэрагъэпэщыжащ курыт школым и пщIантIэм дэт, Хэку зауэшхуэм хэкIуэдахэм я фэеплъыр. «ТекIуэныгъэм и махуэшхуэр абы иIэ мыхьэнэм хуэфэщэжу дгъэлъэпIэну ды­хуейт. Япэ игъэщыпхъэ Iуэхухэм ящыщт ди мамыр гъащIэм пап­щIэ зи псэр зыта ди къуа­жэдэс-хэм я фэеплъыр къэгъэ­щIэ­рэщIэ­жы­ныр. Сэ къызгу­ры­Iуэрт си къару за­къуэкIэ абы ­сы­­зэ­ры­пэмылъэщынур, ауэ гу­дза­­къэ зиIэ цIыхухэм утыку сыкъызэрырамынэнури зыхэс­щIэрт. ЩIэгъэкъуэнышхуэ къытхуэхъуащ абы щыгъуэм Дзыхь­мыщI Заур. Фэеплъыр зыхуей хуэзэу зэгъэпэщыжыным те­кIуэ­дэну мылъкур псори абы къыбгъэдэкIащ. Хьэтуейм и зыу­жьыныгъэм, абы щекIуэкI псэу­кIэр егъэфIэкIуэным теухуауэ ­къетхьэжьэ сыт хуэдэ IуэхумкIи Заур щIэгъэкъуэнышхуэ къыт­хуохъу. Си щхьэкIи къуажэдэсхэми къабгъэдэкIыу а щIалэм фIыщIэ худощI и къуэпсыр ­къыщежьэ жылэжьым къыхуищI гулъытэм папщIэ», - жеIэ къуажэ унафэщIым. 
Жылэм къыщрахьэжьэ дэтхэнэ зы Iуэхуми и Iыхьэ зэры­хилъхьэным хущIокъу Дзыхь­мыщIыр. Къапщтэмэ, Къурмэн, нэщIикIыж махуэ лъапIэхэм деж и гулъытэ ялъегъэс жылэм дэс унагъуэшхуэхэм, хуэмыщIахэм. Ап­хуэдэу Хьэтуей блэкI къэрал ­гъуэгу нэхъыщхьэм пэгъунэгъуу гъуэгум тетхэм нэмэз щащIын ­папщIэ ящIа унэм и ухуэныгъэми ар зыхуей хуэзэу зэраузэдами ­Заур и ахъшэ хэлъщ. 
Щытхъур зыфIэмыфI щIалэщ ДзыхьмыщIыр, ауэ къуажэр ефIэкIуэнымкIэ абы зэфIигъэ­кIыр зылъагъу жылэдэсхэм гуш­хуауэ ираIуэ абы и цIэр икIи и фIыщIэр хагъэкIуэдэну хуейкъым. Къуажэм и зыужьыныгъэм хуэунэтIауэ къыхалъхьэ      сыт хуэдэ жэрдэмри Iуэху пыу­хыкIакIэ къазэрыдиIыгъым папщIэ, ДзыхьмыщIым хуагъэфэщащ «Хьэтуей къуажэм щIыхь зиIэ и цIыху» цIэ лъапIэр. 
IуэхуфIхэмкIэ зи гъащIэр гъэнщIа цIыхурщ нобэрей зэманым и лIыхъужьыр. Шэчыншэу апхуэдэщ ДзыхьмыщI Заур, абы и гъащIэр зыхуэгъэпсар и Iэр къызыпекIуэкIкIэ къэ­зыухъу­реихь­хэм ядэIэпыкъунырщ, дунейм гуапагъэр щыгъэбэгъуэ-ным и Iыхьэ гуэр зэрыхилъ­хьэ­нырщ. 
Насыпышхуэщ уи быным хуэ­гъэ­за псалъэ гуапэхэр зэхэп­хы­ныр, и щхьэпагъ Хэкум иригъэ­кIыфрэ гъащIэм ехъулIэу ар плъа­гъуныр. Пэжщ, а псом я лъабжьэр къыщежьэжыр анэм и дежщ - Заур и анэ Марие игъэсащ ДзыхьмыщI лъэпкъым и мызакъуэу, жылагъуэр зэрыгушхуэн щIалэ. 
Псэ хьэлэл, гу къабзэ зиIэ Дзыхь­мыщI Заур адэкIи мурад дахэхэр иIэщи, ахэри къехъулIэну, и зэфIэкIми хэхъуэу псэуну ди гуапэщ. 
Тхьэхущынэ Ланэ.