Инновацэ технологиехэм елэжь е абыхэм пыщIа Iуэхутхьэбзэхэр зыщIэ технологиехэмкIэ IуэхущIапIэ цIыкIухэм (МТК) къэрал дэIэпыкъуныгъэхэм я фIыгъэкIэ хуэдитIкIэ нэхъ псынщIэу икIи жыджэру заужь. Псалъэм папщIэ, УФ-м Экономикэ зыужьыныгъэмкIэ и министерствэмрэ МСП Корпорацэмрэ я программэм ипкъ иткIэ, худэчых зыхэт кредит къэзыщта апхуэдэ компаниехэм, псоми зэхэту сом мелард 265-м нэблагъэ хэхъуэу яIащ илъэс блэкIам.

Къэрал дэIэпыкъуныгъэм и фIыгъэкIэ, технологиехэмкIэ зы IуэхущIапIэ цIыкIум и закъуэ хэхъуэу иIар ику иту проценти 174-кIэ нэхъыбэ хъуащ. Псалъэм и хьэтыркIэ, 2021 гъэм, программэм лэжьэн иджыри щIимыдзэ щIыкIэ, абы и хэхъуэр сом мелуан 337-уэ щытамэ, 2024 гъэм ар сом мелуан 926,2-м нызэрыхьэсащ. Псори зэхэту МТК-м и IэнатIэхэм я хэхъуэр процент 77,4-рэ мэхъу: 2021 гъэм щыIа сом мелуани 107,7-р 2024 гъэм сом мелуани 191-м нэсащ.

 МСП Корпорацэм иригъэкIуэкIа къэпщытэныгъэхэм къызэрагъэлъэгъуамкIэ, технологиехэмкIэ компание цIыкIухэм нэхъ жыджэру икIи нэхъ псынщIэу заужь хьэрычэт IэнатIэ мащIэмрэ курытымрэ я IуэхущIапIэхэм елъытауэ. ЖыпIэнурамэ, 2021 гъэм щегъэжьауэ УФ-м Экономикэ зыужьыныгъэмкIэ и министерствэм и реестрым хыхьэ МТК-м хыхьэ IуэхущIапIэхэм щылажьэхэм я бжыгъэм процент 39-кIэ хэхъуащ. А пIалъэм къриубыдэу абыхэм псоми зэхэту лэжьыгъэ IэнатIэщIэу мин 50 къызэIуахащ: зы компанием ику иту лэжьыгъэ IэнатIи 9 къызэригъэпэщащ. МТК-м и IуэхущIапIэхэм псоми зэхэту щылажьэхэм я бжыгъэр цIыху мин 748,2-м нызэрыхьэсащ. Апхуэдэу щыхъукIи, МТК-м и зы IуэхущIапIэм щылажьэхэм я бжыгъэм проценти 3-кIэ хэщIащ. 

УФ-м Экономикэ зыужьыныгъэмкIэ и министерствэм и реестрым щатхауэ технологиехэмкIэ IуэхущIапIитI Къэбэрдей-Балъкъэрым щыIэщ. 2023 гъэм абыхэм яIа хэхъуэр сом мелуан 850-м щIигъуащ, 2024 гъэм – сом меларди 2,4-м. 2023 гъэм псори зэхэту цIыху 60 щылэжьамэ, 2024 гъэм а бжыгъэр 150-м нэсащ.

Технологие лъагэхэм, ехьэжьахэм, пэрыт инновацэ компаниехэм, УФ-м Экономикэ зыужьыныгъэмкIэ и министерствэмрэ МСП Корпорацэмрэ я программэ щхьэхуэхэмкIэ худэчых зыхэт кредитхэр зратахэм нэхъ псынщIэжу заужьащ адрейхэм елъытауэ. 2024 гъэм и кIэхэм ирихьэлIэу апхуэдэ дэIэпыкъуныгъэ зрата IуэхущIапIэхэм я бжыгъэр 286-рэ хъуащ. 2021 - 2024 гъэхэм къриубыдэу лэжьыгъэ IэнатIэщIэу мини 6,8-рэ абыхэм къызэрагъэпэщащ е зы IуэхущIапIэм хуэзэу 24-м нэблагъэ. Ар хуэди 2,5-кIэ нэхъыбэщ ику иту МТК-м и адрей IуэхущIапIэхэм щыщыIэм нэхърэ.

2025 гъэм, программэ щхьэхуэм ипкъ иткIэ, МТК-м хыхьэ инновацэ компаниехэм щыщу иджыри IуэхущIапIэ 59-м худэчых зыхэт кредитхэр иратащ икIи, а программэм лэжьэн зэрыщIидзэрэ, зэгурыIуэныгъэу псори зэхэту сом мелард 56,7-рэ и уасэ зэращIылIащ.

Къэрал дэIэпыкъуныгъэ зрат технологиехэмкIэ компание цIыкIухэр зыпэрыт IэнатIэхэр зэпэщхьэхуэу къэдгъэлъагъуэмэ, абыхэм я процент 44-м инновацэ технологиещIэхэр къыщIагъэкI е къагупсыс, процент 19-м нэблагъэм естественнэ, техникэ, метрологие щIэныгъэхэмкIэ щIэныгъэ къэхутэныгъэхэр щрагъэкIуэкI, процент 11-р машинэ щIын  IэнатIэм щолажьэ.

НАУРЫЗЫКЪУЭ Щэуей.