Къэбэрдей-Балъкъэрым узыншагъэр хъумэнымкIэ и министр Къалэбатэ Рустамрэ Аруан щIыналъэ администрацэм и унафэщI ЛIыжьыкъуэ Хьэзритрэ зрагъэлъэгъуащ Шэрэдж Ищхъэмрэ Ипщэмрэ къыщызэIуаха амбулаторэщIэхэр. Ахэр щаухуащ абдежхэм щыта ухуэныгъэжьхэм я пIэкIэ.

Шэрэдж Ищхъэрэм къыщызэIуаха амбулаторэр метр зэбгъузэнатIэ 350-рэ, Шэрэдж Ипщэм ейр метр зэбгъузэнатIэ 556-рэ мэхъу. Ахэр иджырей медицинэ мардэм къотIасэ, зыхуей-зыхуэфIхэмкIэ нэсу къызэгъэпэщащ икIи зы лэжьэгъуэ махуэм къриубыдэу цIыху 50-м хуэдизым зэуэ медицинэ дэIэпыкъуныгъэхэр тIуми ирагъэгъуэтыфынущ. Абыхэм хэтщ терапевтым, нэгъуэщI узыфэхэр зыпкърытхэм щеIэзэ кабинетхэр, узыфэр къыщахутэ пэшхэр, махуэкIэрэ сымаджэхэр зыщIэлъ къудамэхэр.

Апхуэдэуи мы махуэхэм гуфIэгъуэ зэIущIэ иращIэкIащ сабийхэм щеIэзэу Тэрч къалэм иджыблагъэ къыщызэIуаха поликлиникэм. Абы зыкърагъэхьэлIащ УФ-м и Къэрал Думэм и депутат Родинэ Викторие, КъБР-м узыншагъэр хъумэнымкIэ и министр Къалэбатэ Рустам, Тэрч щIыналъэ администрацэм и унафэщI Хъущт Аслъэнбий сымэ. ХьэщIэхэм поликлиникэм зыщаплъыхьащ  икIи ялъэгъуа псоми щыгуфIыкIащ.

  КъБР-м Узыншагъэр хъумэнымкIэ и министерствэм къызэритамкIэ, иужьрей илъэс 69-м къриубыдэу иджы япэу къызыхуэтыншэу зэрагъэпэщыжауэ аращ мы поликлиникэр.

Тэрч къалэм сабийхэм щеIэзэ и поликлиникэм къыхузэщIэубыдэнущ езы къалэмрэ абы къедза къуажэхэмрэ я сабий мин 13-м щIигъу икIи зы лэжьэгъуэ махуэм къриубыдэу сабии 120-м медицинэ Iуэхутхьэбзэ зэхуэмыдэхэр хуащIэфынущ, медико-санитарнэ, дэIэпыкъуэгъу псынщIэри хэту.

Мыбы и пэш кIуэцIхэр зэрахьащ, кабинетхэр нэхъыбэ ящIащ. Апхуэдэ щIыкIэкIи, зи чэзум пэплъэу щыс адэ-анэхэмрэ сабийхэмрэ абы трагъэкIуадэ зэманыр нэхъ мащIэ, цIыху зэIэзэхэм я бжыгъэр нэхъыбэ хъуащ.

 УхуакIуэхэм ирагъэкIуэкIа лэжьыгъэхэм хыхьэу поликлиникэм и унащхьэр, блынджабэхэр кърагъэбыдэкIащ, ток кIапсэхэр, псы хуабэ, щIыIэ зэрыкIуэ бжьамийхэр, нэгъуэщIхэри щIэуэ зэрахъуэкIащ. ИужькIэ, поликлиникэр зыхуей-зыхуэфIхэмкIэ зэпэщ ящIащ.

 А махуэ дыдэм, УФ-м и Къэрал Думэм и депутат Родинэ Викторие, КъБР-м узыншагъэр хъумэнымкIэ и министр Къалэбатэ Рустам, Тэрч щIыналъэ администрацэм и унафэщI Хъущт Аслъэнбий сымэ щыIащ Дей къуажэм къыщызэIуаха амбулаторэщIэми.

Ар нэгъабэ ирагъэжьауэ щытащ икIи илъэситI иримыкъу пIалъэм къриубыдэу иджырей медицинэ мардэм къитIасэ, обрудованэщIэхэмрэ IэмэпсымэхэмкIэ зэпэщ хъуа амбулаторэщIэ яIэ хъуащ Дей къуажэм дэсхэмрэ абы пэгъунэгъу жылэхэм щыпсэухэмрэ. Тэрч щIыналъэм и цIыху минитхум щIигъум я узыншагъэм щыкIэлъагъэплъыну апхуэдэ Iэмалхэр мыбы щыIэщ.

ИщхьэкIэ зи гугъу щытщIа лэжьыгъэ псори ирагъэкIуэкIащ «ГъащIэ кIыхь икIи купщIафIэ» лъэпкъ пэхуэщIэм ипкъ иткIэ.

  МЫСОСТ Наурыз.