КъМР-ни Башчысы Казбек Коков видеоконференция амал бла къыралда коммунал сферада къалгъан-къулгъанланы жарашдырыуну  къурау соруулагъа аталгъан кенгешге къатышханды. Аны Россейни Правительствосуну башчысыны орунбасары Дмитрий Патрушев бардыргъанды. 
Сёз бу бёлюмде жангы амалланы сингдириуню юсюнден болгъанды, деп билдиргенди регионну оноучусу телеграм-каналында. Бу бёлюмде инфраструктураны игилендириу 2030 жылгъа дери салыннган борчланы арасында магъаналы жумушладан бириди. Коммунал мюлкню къалгъан-къулгъанлары толусунлай жарашдырылыргъа керекдиле, багуш асыралгъан полигонланы жартысы кетерилирге, тёртден бирин а жарашдыргъандан сора, жангыдан хайырланырча мадарла этилирге тийишлидиле. Къалгъан-къулгъанланы жарашдырыу жаны бла жумушла къалай толтурулгъанларын Россейни Табийгъат къоруулау министерствосу бла Россейни экология жаны бла оператору тинтгенлей турадыла. 
Кенгешде регионлада къалгъан-къулгъанланы тёгерча орунла эмда аланы ташыгъанда транспорт бла байламлы болум сюзюлгенди. 
- Бизни республикада коммунал сфераны къалгъан-къулгъанларын атарча контейнерле орнатылгъан 5 мингден кёп  жер барды. Битеу да бирге уа тюрлю-тюрлю контейнерле 10 минг чакълы бирдиле. Эски, жараусуз болумгъа жетгенлени алышыр мурат бла быйыл энтта 500 орун алыргъа мурат барды. Дагъыда 12 жер къураллыкъды, 20-сы уа жангыртыллыкъды, - деп билдиргенди Казбек Коков телеграм-каналында. 
Кенгешде регионлагъа энчи техниканы лизинг амал бла сатыуну онглары да сюзюлгендиле.