Бу кюнледе «Жашау этерча инфраструктура» миллет проектге кёре «Прохладный-Эльбрус» трассадан Нейтриногъа баргъан Губасанты жолгъа къыстау ремонт этиле турады.  Жангыртыу   ишле 1,5 километр  тенгли бирде тамамланыллыкъдыла, деп билдиредиле КъМР-ни Транспорт эмда жол мюлк министерствосуну пресс-службасындан. 
Огъары Басханда дунияда биринчи нейтрино обсерватория  ишин 1973 жылдан бери бардырады. Ол Ындырчы тауну  ичинде эм жерни теренинде орналады. Аны баш борчу нейтрино кесеклени тутаргъа эм тинтиргеди. 
Бюгюнлюкде да алимле проектге аслам эс бурадыла эм илму жаны бла уллу иш бардырадыла. Жолну, обсерваторияны ишчилеринден сора да, элде жашагъанла да  кюн сайын хайырланадыла. Мында иги кесек  жашау журт, медицина ара эм от ёчюлтюучю бёлюм да орналадыла. 
Кёп болмай жолчула, жолну мурдорун кючлеп, кенгертип, жангы бордюрла салып бошап, биринчи къат асфальт жайгъандыла. Жангы излемлеге кёре, хар къатны  къалынлыгъы 7 эм 5 сантиметрге жетерикди. 
Бусагъатда жаяу жюрюгенлеге тап болурча жолну жаны бла кенг тротуар ишлене турады. Аны бла бирге къоркъуусузлукъну жалчытыугъа да тийишли халда эс бурулады. Ол санда кече жарыкъ болурча  чыракълы чыпынла  да  салынадыла. 
Жууукъ заманда экинчи къат асфальтны жаярыкъдыла, темир буруула, жорукъланы билдирген белгиле бла ызла, башха затла да жарашдырыллыкъдыла. 
Планнга кёре объектни быйыл кюз артындан кеч къалмай хайырланыргъа берирге керекдиле. 
Эсге сала айтсакъ, «Жашау этерча инфраструктура» миллет проектни магъанасы Россейни инсанларыны болумларын игилендириргеди, жолла тап эм къоркъуусуз болурча этергеди. Аны ючюн тынгылы материалла бла къыйматлы  технологияла хайырланыладыла. Битеу ишле болжалдан кеч къалмай эм тынгылы толтурулурларына къыралны жанындан специалистле эм жамауат организацияланы келечилери дайым кёз-къулакъ болгъанлай турадыла.

Магометланы Сулейман.